Tanü Washington nung Modi aser Trump na ajuruteptsü

New Delhi, June 25 (Agencies): Hombarnü Washington nung Prime Minister Narendra Modi-i US Tir Donald Trump den mezüngbuba senden amentsü.
“Hombarnü White House nung India PM den ajuruteptsü atema yongyar. Chichiba tembar ka den tongtipang onüktem lemsateptsü” ta Honibarnü Trump-i Twitter nung metetdakja liasü.
Iba atema Modi-ia Deobarnü Twitter nung US tir dang pelaba metetdaktsü.
“Nai ni mulungsoa agizükba atema kanga pelar aser nü den senden mena onüktem lemsateptsü yongyar,” ta Modi-i ashi.
Modi aser Trump tsüngda senden amendang linük ana tsüngda amalitep, kiralongraba anema raraba, Indo-Pacific region nung defence partnership, trade & law enforcement onüktem jembitsü, ta White House Press Secretary, Sean Spicer-i ashi.
Modi-i Prime Minister inyaktsü tenzükba sülen tang agi pungubenbuba atema US semdanger. 2014 nung pai mezüng US semdangdang New York nung aliba Madison Square Garden nung India nunger den sensaksem mapang agi.
Yaküm March ita Modi-i US semdang aser ibaji Nuclear Security Summit nung adentsü atema liasü aser iba sülen taoba tir Barack Obama-i jaokba atema pai semdang.
Donald Trump-i H1-B visa tali alenbangtsü merangba aser Paris climate agreement nungi pilaba mapang ka Modi-i pa den ajuruteptsü.
H1-B visa ya US nung aliba Indian IT company tem atema kanga tongtipang lir aser Paris climate agreement atema Modi aser Obama nati kanga temulung agüja inyak.
Paris agreement ajanga India aser China linüktemi dollar billion aika ajangzüktsü meranger ta Trump-i aija US madentsü atema telemtetba agi aser iba atema alimai pa aitsüogo.
H1-B visa onük atema External Affairs Minister Sushma Swaraj-i ashiba agi, iba onük atema ashishitepaka, tang tashi iba dak sendakba maparen nung temelenshi kecha mangur.
India-US shishilembatepba maparen nung sen $115 billion shi lir aser iba asoshi Modi-i “Make in India” aser Trump-i “Make in America” onüktem benoka olemteptsü imlar.
Lennir ana senden nung tongtipang onük kaji kiralongraba indang asütsü, kechiyong India aser US nati iba khuret atema külemi yaritepa inyaker. Pakistan-i Kashmir nung kiralongraba pusema teyari agütsüba aser Afghanistan nung yimjung atema India-Iran-US linüktemi mapa inyakba onüktem tongti süa jembitsü akok.
Senden nung China-i tenzükba One Belt One Road (OBOR) onük benoktsü akok, kechiyong India-i iba mapatong anema nokdaker.
Taküm January ita US tir akümba sülen Trump aser Modi na asemben tashi phone ajanga jembiogo aser Hombarnü tena senden mezüngbuba amenba ajanga putu 21 buba nung India-US tesentaktep atema lenmang yanglutsü.