Tanüla anir arusang

Nagaland nung Tsüngrem o jembir sayutsüngir tajung aika lir saka Rev.Lano Longchar mali asenok aika tanüla nung kanga azüngmeyaktsü. Pa ya o tanük aser tanemi dang jembir ka liasü saka nisung mulungjangbo pa o tanük jagi atentendaktsü aser temulungjang temerang kenyongi yimsaa odaktsü. Ibaji pa tashi agi masü saka pai jembidang tanüla temeshii mapa inyakba kulitem liasü. Aji oda, tanüla temeshi agi sünga, pa aolen ajak nung nisungtemi pei temenen nangzüka Tsüngrem bushidaktsü, tasür shia arudaktsü, tashidak tamajung agi shirangertem aneptsü aser tamangertem taküm kibong jenjang kümdangshidaktsü. Asür Rev.Lano Longchar ya moijing ket nungi rakzüka tanüla anir arur tanüla nokinketer, taneptsür tulutiba aser nübortem Tsüngrem nungi mepiladaktsütsü asoshi teti tanüla nung Tsüngrem dang sarasadema aliba tanüla lenir ka liasü. Atangji, pa taküm nung Tsüngrem tenzüktsü asoshi telemtetba magidanga pai pei tetsü taso li yimten temeten asoshi timtem aser tetsübutsü tensa tia aika ajanga linük tenzükba lanur ka liasü. Tsüngremi Pa mapa nung tenzüktsü asoshia pei tetsü taso lim meimba shisatsü aketba senso tajungang aginür. Aji oda, pei lima aser nübor meimba nisungi dang Tsüngrem mapa nunga takok ngua inyaktetter. Iba kuliji asenoki Mosa, Yihusua, Nehemia aser tenyar Paul nungertem mapa nungi angatettsü. Atangji, nisung shia nem Tsüngremi sempet balala agüja lir, anungji iba sempetji meteta nübortem asoshi amshitsübaji nisung shia asoshi kanga tongtibang lir. Tetezü, nisung ka nem Tsüngremi sempet ka agütsübaji pei bok kisüng asüngtsü mesüra pei yangku kisüng asüngtsü agütsür masü saka tangar yaritsü asoshi dena agütsür. Iba kasaji Tsüngrem tenzüktsü asoshi shimtetba purtemjia lir. Tanü asen lima nung Tsüngrem tenzükertem aika lir. Parnok ajaki Tsüngrem o jembir saka ajakibo nisungtem mulungjang nung kongshia mejembiteter. Sayutsüngir aika lir saka ajakibo samaa aliba tanülatem anir marutetter. Laishir aika lir saka ajakibo Tsüngrem o tejangja rateta magütsütetter. Anungji, Tsüngrem tenzükertem rongnungsa süaka shibai nisung mulungjang nung kongshia jembitetter aser tanüla anir arutetter, parnokji nübortem asoshi kanga tenüngdaktsü. Tsüngrem tenzükertem rongnungsa süaka shirnok dak taneptsü ain keta lir, shirnoki kija, kibong aser nübortem tarutsü tia indang shintetter, parnokji nübortem asoshi kanga tongtibang lir. Item ama tanüla agi sünga Tsüngrem tenzükertem melira asenok jara aser kilem maliba ki ka nung alir amai asütsü. Tanü Rev. Lano Longchar asenok nungi pilaa orr asenok tia indang bilemdang dang, tongpang teraradak nung nokinketer lenir kati toktsür amai bilemer. Atangji, Tsüngremi iba tongpang nung nokdaktsü asoshi pa melen asenok nem ano tanüla agi sünga aliba tenzükertem moatsütsü imlar. Tanü putu yabo temenenia Tsüngrem den  kasasa toktepa sayatenya inyakba putu ka lir. Iba ama putu ka nung Tsüngrem tenzükertem tanüla temeshi agi sünga melira, ashiko akhidang tenyartem mapang amato moijingiang meyiper merenshitsü. Tanü asen lima ochimashi, japujari, tashiyim aser tashidak tapu balala agi sünga lir. Item ama alima mapatem anema nokdaktsü asoshi tanüla nung tashitait aser Tsüngrem ain aketba tenzükertem nüngdaker. Tsüngrem tenzükertemi tanüla anir arutettsüsa, Laishiba rateta shitettsüla, atsüngzüka oa aliba purtem mesotsüla, shiranga aliba purtem aneptsütsüla aser nübortem tarutsü tia indang shintettsüla. Item ajakji Tsüngrem nungi aruba sempettem lir. Aji oda, Tsüngrem tenzüker ka ket nung tanüla sempet aika rongnung ka danga melira nok nü maben rarai aoba den kasa asütsü. Iba jagi tanü asenoki mojing tongpang makoker. Iba ama mapang ka nung, gari aser tayimtsü nung dang masü saka  tetsüng agi dena tesem ajaklen oa osangtajung proker,  Lano Longchar ama indangindanga Tsüngrem o belenzüka agütsür, tanüla temeshi agi sünga sayutsüngir aser pei lima aser nübortem meimba Tsüngrem tenzüker  kanga nüngdaker. Iba nüngdakji ataloktsü atema tanü lanurtemi Rev.Lano Longchar dak aketba sempet tajungji asen senmang küma amshitsüsa Tsüngrem nungi taochi meshitsüla.