Tanüla chiyongtsü

Asenok shi temang taküm alitsü asoshi chiyongtsü nüngdakba ama Tsüngrem den tanüla nung tashi itta alitsü asoshia tanüla chiyongtsü nüngdaker. Aji oda, asen shi temang tashi itta alitsü aoshi kechi koda meranga inyaka chiyongtsü bushir aser anepalua awazüa achir, iba kasaji tanüla chiyongtsüjia anogo shia Tsüngrem dang meshia achitsübaji kanga nüngdaker. Yohan tapu 6: 35 nung Yisui ashir, ” taküm chiyongtsüji ni, anungji shirnokisa kü dangi arudir kodanga mayatsü aser shibaisa kü dak amangdir kodanga metzüratsü.” Iba Laishiba tekong ajanga asenok nem angatetdaktsünübaji kodangsa asenok tanüla nung yaa-tzüraa aiter, idangji chiyongtsü meshia Yisu dangi aotsüla, kechiyong asenok tanüla taküm asoshi chiyongtsüji Yisu lir. Aji oda, Yisui asenok dang sarasademtsü sayuba nunga kotak nung aliba obala Tsüngrem dang anogo shia chiyongtsü meshia sarasademtsü sayu. Teti shi temang nung tebok sünga alitsü nüngdakba ama tanüla agia sünga alitsübaji Laishiba tesayuba lir. Ajisüaka, aiben asenok tanüla nung yaa tzüradang asenoki tanüla chiyongtsü meshia Yisu dangi aotsü amadoker mesüra nungnanger mesüra mouner. Tanüla nung yaa tzürabaji pei taküm nung tashi mait aika liaka Tsüngrem bushinüba tejangraba ka aitbaji asütsü. Aiben asen taküm nung Tsüngrem dangbo alima rongsen temeimba akümer mesüra Tsüngremi mulungba masülen tounüba akümer, ajisüaka asen mulungjang nung item tatidangji koknüba mulungsentsü arubaji tanüla nung yaa tzüraba asütsü. Asenoki ochishia linür saka melitetter, asenoki Tsüngrem den anogo shia jajaner saka atsüngzüka oadoker. Aji oda, asenok temenen nung alanger saknüba aser Tsüngrem bushinübaji tanüla nung yaa tzüraba asütsü. Aji oda, David chubaia  T.Ken 42 nung ” Mesüi ayongtzü rongjenba ama, kü nülai, oh ! Tsüngrem, na asoshi rongjener. Kü nülai Tsüngrem asoshi, oda taküm Tsüngrem asoshi tzürar. Ni kodang arutsü aser Tsüngrem jak angutsü,” ta sarasademba olaji tanüla nung yaa tzüraba lir. Alima nung nisung asoshi temenen menaba lendong dang nungibo temenen menar menangzüknüba aser Tsüngrem mebushinüba lendongsa tuluba. Tetezü, shi temang nunga tashidak alinung dang yaa tzüra maitba amato, tanüla taküm nunga Tsüngrem taochi aginüa meyongyaba, mayaba aser metzürabaji kanga tia maka tesamadaki aotsü renemer aliba purtem asütsü. Asenok amangba purtem asoshi tekümdangtsü kaji asenok temulung meyipdang mesüra asentenshi mapang tanüla agi sünga alidang, iba tanülaji kodanga meroseptsü amai bilemer. Ibaji asenok shi temang nung tebok sünga alidang kodanga mayatsü aser metzüratsü amai bilemba amato lir. Ajisüaka, khen chiyongbaji teperi masü taküm ali tashi chiyongpet chiyongtsü, kechiyong yapet ayatsü. Iba kasaji tanüla nunga khenkhenbo tashi mait aotsü, tanüla remsepa doktsü ano karbo atsüngzüka aotsü. Ajisüaka, asenok asoshi teimla ka lir, ibaji Yisu Khrista. Paji asenok asoshi chiyongtsü aser taküm tzü. Aji oda, Pai agütsüba chiyongtsü aser Pai agütsüba taküm tzüji kodanga mayatsü aser metzüratsüsa chia ajemtsübaji asenok tanüla taküm asoshi kanga nüngdaker. Atangji, na Tsüngrem den shitak alitsüa akok saka taküm piyong asoshi khen sarasademba aser khen tenla agütsüba aser khen tajung inyakba agi meperitsü. Shi temang asoshi kechi koda asenok anogo shia chiyonger, yamaji tanüla taküm asoshi anogo shia chiyongtsü nüngdaker. Tsüngremi Israel nungertem nem Kanan lima matong tashi mayatsüsa mana khen dang agütsütsü koka liasü, saka Pai anogo shia parnok yari dang agütsü. Item ajakji shi temang anema alitsü asoshi kechi koda temang arakzüka exercise agitsüla, iba kasaji tanüla taküm nunga anogo shia agitsüba tamang exercise ka lir. Aji oda, anogo shia tatidang nung metsüktsü, tamajungba leni maotsü aser chiyongtsü asoshi sarasademtsüla. Ibaji Yisu Khrista tesayuba aser ibaji benshi nung dang asenok tanüla nung tzüra atemtsü. Ibaji tanüla chiyongtsü angudak lir. Aji oda, David ama tanüla nung yaa tzüraa alirtem kar danga lira, tepelatsü, kechiyong parnok tipatemtsü aser kotak yimliji parnok meyong asütsü. Mathi 5.