Tanülar Rara Tongpang Tenzükogo

– I. Zülu Pongen,
Mongsenbai Ward, Mokokchung.

Khrista arutsü tsüngküm mongpu agi sayur, Yisui ashi, ni tanaben arutsüji kübu dak alaka nia memetet, saka tsüngküm mongpu agi sayutsü ta Mathi 24: 4 nung Yisui ashi, Shingaia nenok mashileni manidaktsütsü kümdangang. Kechiaser kü nüng nung aikati ni Khrista ta jembia arutsü aser aika mashileni anitsü, ano raratsüba otsü aser raraba osangtem angashitsü, idangji nenok maoksatsü kümdangang, kechiaser itemi ataloktsüla.
Tanü tensa anogoshia paper nung angur, kin o kin, yimli o yimli, nisung rongnung yimjung jembiaka yimjungbo mali aser ochi samaogo, tesemba, tenük merem agi nisungtem yimya balala amshia nisung tepseteper, tanü ashilongka tongpang tenzükogo.
Democracy temzüng nung keta aliba ama sorkari küm pungo shia election bener arur. Joko asenok meranga inyaker chiyongertem to election nung party mapa mazüngi inyaktepa yimya süpaba agi oda aluyimera joko alu mapaji tenüng agi tang tilala yimteper aser election atongtsü küm ka lia temulungjang ajunga election nung yur liteper.
1964 nungi 1970-80 tashibo party ana dang liasü, saka tangbo asen lima nung adokba regional party asem pezü den India lima aliba national party ajak bener arua tokteper. Item yagia nisunger libaliru meranga inyaker ochishia aliba yimya raksatsür aser tanela nunga tarak akettsüsa teimla samatsür, kechiaser item party ajak jagi sen bener nübu bushia arudang voter tem to tenük tulu tener teka anatsülen songlar tarur ajak dang sen meshir, yagi pei ochi vote samatsür aser candidate ajak akoksatsür tatem nungbo ka tang adoka MLA akümer. Senso ajak temeten alinungji pei-i yarinüba yaritsü shinga party-ia nokdanga mali.
Tamalen mapang kabo India nung Congress party ya kodanga melaotsü ama tashi ita liasü, idangji Nagaland nunga Congress ticket dang raktepa aru. Tangbo India nung BJP party ya takar asünungji Nagaland nunga BJP nung aitsü lenmang bushir. Tangbo India sorkar ya BJP kümogo, Paul-i ashi, tepokji nü tsüngrem tekümdaktsü, ano Yisu-ia am tesa agi taküm malir saka Tsüngrem bang nungi adokba o shia agi taküm alitsü ta shia mojing tongpang akok.
Naga Khristantem joko tasü ita saksalema alitsü mapang tongogo. Tanü shinga party daka ochi mali, BJP ya-a rongsen ketsüng aser terenlok nungbo ochishir ama süaka ano yabo tanela asoshi lendong tulu keta aliba party ka lir, Tsüngremi kanga mepelatsü. Nai BJP yaria Nagaland nung BJP sorkar arudaktsüra India nungbo mapang kabo sentepi aotsü melen office-i aotsüsa akümtsü. Nai meyilongiang angatettsü, idangji taochi süidemer alitsü. Shibai BJP nem vote agütsür pai süngyanglu nem vote agütsür. Nai nü sasa mepelai akümtsü oda odabo sarasadema mesünüi akümtsü/bilemtsü. Idangji nai bilemang tanela temeshi-i na toktsüogo. Kodang Tsüngrem Tanelai toktsüdir mojingi naji pa asoshi tongti worker asütsü, pai na yaritsü. Indian Sorkari prangpong bener nai shiba nem vote agütsür ta marutsü, saka sen bener shisakar ang ka ner kibong timtem nung yaritsü teimla bener arutsü, nai shiba nem vote agütsütsü.
Takümbo BJP arur asünungji kidang kimang aser kinüngertem asoshi ‘aiatai’ meyarili ta asüa majung, yaridi ta asüyonga animesüngzük, Khrista akar asoshibo kinünger adianutem asoshi teratatsü mapang tongogo. Senso tajungtem Pauli ashi ama asen senso kotak nung alitsüsa na tangatetba kümküma lir ma(?) ya tanü mapang lir.
DAN sorkar bo BJP masü sür nung Delhi tongogo BJP nem vote agütsütsü asoshi, kechiaser asen lima nung inyaka atalokba rongsen kecha maka nung par senpong ajak Delhi nung BJP sorkar ket nungi bener arua achitsüba dang lir. Khristantemi tajung majung angateta bendangtettsü tanü mapang lir. Na koda? shiba shimtsü ?