Tanungba ODI ana nung Dhoni masayatsü

Ranchi, Metsüremi/March 9 (Agencies): India nunger asayartem rongnungi tejentiba Mahendra Singh Dhoni, Australia den tanungba ODI asaya nung masayadaktsüi anisüngzükdaktsütsü aser Hokolbarnü asaya ya pa asoshi linük nung tatembangbuba asaya asütsü akok.
“Tanungba asaya ana nung temelenshi kar bener arutsü. Mahi asaya ana nung masayai anisüngzüktsü,” ta India team assistant coach Sanjay Bangar-i osangbenertem dang ashi.
October tashi nung India team linük nung asayatsü asoshi renema mali anungji Dhoni asoshi linük nung iba ya tatembangbuba asaya asütsü akok.
Dhoni asoshi World Cup ya India team nungi tatembangbuba asayamung asütsü akok ta nisung aikati bilemer.
Ajisüaka Jharkhand State Cricket Association-i, linük nung taruba asayamung nung par state nung asaya kabosa asayatsü ta amanger kong Dhoni-i tatembangsa asayatettsü.
Ajisüaka Dhoni-i publicity mesapuba reprangdangra iba tebilemba ya ataloktsü kanga timlabo mali.
Mohali aser New Delhi nung asayatsü aliba tanungba ODI ana nung Rishabh Pant wicket keeper asütsü. Kasa mapa nung tetsüng yiruba sülen Mohammed Shami-a asaya ana nung ya masayatettsü.