Tanur 11 tashiyim agi raksatsür tepsetba nangzük

New Delhi, July 19 (Agencies) : Noida nung nisung kati Delhi, National Capital Region aser Western Uttar Pradesh nung tanur 15 dak tashiyim agi shi nung medemba aser parnok 11 tepsetba atema nangzükogo.
Iba nisung ya driver ama inyaka aru aser 2009 nungi pai iba mapa inyaktsü tenzük.
July 15, 2015 nü küm trok tanur ka tashiyim agi raksatsür tepsetba atema police-i arishi küm 24 tain Ravinder Kumar apu.
Tanutsüla mang anasa driving license ka anguba sülen police-i Ravinder apu.
Tang tesüdak ki ka nungi tanutsülaji sama. Lar tsüraburtemi July 14 nü la samaba ken o benok. Parnok aliba kidang metsümeshidak maliba agi tanutsülaji kimai metsümeshitsü atema aluba sülen sama.
“La kimai metsümeshitsü atema alu aser meyipa maru. Onoki police station-i oa osang sangoktsü aser police-i onok dang nenokia tanurji bushiang aser onoki bushitsü ta ashi. Ozü kidanger ka jabasoi la tasümang angu” ta tanutsüla tetsüi osangbener dang ashi.
Taoba mapang pai tanurtem tashiyim agi shi nung medem aser tepset ta Ravinder Kumar-i police tsündgang nangzük.
Yaküm pai tebur chanu ka tekong nung arang aser tzü tank ka nung yutsü. Ajisüaka tanubosang taküm lia angu saka kanga mejungi yirur liasü. Iba tataloka atema Kumar apu saka taküm küm tetenzüklen pa bail nung chiok.
Police-i ashiba agi, parnoki Kumar dang asüngdangyaba tembangogo aser pai ashiba nung ajemdaker teinyaktsütem inyaktsü.