Tanur agitsü-magitsüji tetsür ka temeten südaktsütsüla: A K Sikri

New Delhi, February 11 (Agencies): Tanur ka agitsü, raksatsü mesüra tanur mabentsüji tetsür ka temeten lir, ta Supreme Court judge, A K Sikri-i ashi.
Tetsürtem tanur agitsü-magitsü temeten, teburtemi tongtibang shilem agiba aser kibong nung telemtetba agiba onük nung jembidang pai iba olen ya metetdaktsü.
“Iba linük nung kodang asenoki tanur agitsü-magitsü temeten indang jembidir, tetsürtem nem maongka kangabo magütsür. Tang puto 21buba nung technology aika aliba mapang asenoki tetsürtem nem temeten magütsüba ajanga ni süngmanger,” ta pai ashi.
Tanü New Delhi nung Jindal Global University (JGU)-i ayongzükba ‘Reproductive Rights In Indian Courts: Celebrating Progress, Identifying Challenges And Discussing The Way Forward’ sentong nung jembidang Supreme Court Judge-i, “Tanur agitsü-magitsüji meimchir ka temeten. Kodang asenoki iba onük jembidir, ibaji tetsürtem indang temeten ka ta meyopktepa jembir. Ano kodang India nung tanur agitsü-magitsü temeten indang jembidir, kibong nung ibaji kinüngbu melung mesüra taintem melung ta jembir. Kodang tanur agitsüsa südir, tetsür aser tebur agitsü ta jembir,” ta paisa ashi.
“Tanur agitsü, raksatsü mesüra tanur abenba nokdangtsüji tetsür melung, aser ibaji la temang dak sendaka lir. Ibaji la temang. Ibaji la temeten. Ibaji la melung asütsüla,” ta paisa metetdaktsü.
Tawa sayaba Bollywood film ‘Pink’ dak sentakba nung, Justice Sikri-i, tanur agitsü asü magitsü telemtetbaji tetsür ka melung südaktsütsüla, ta ashi.
Kaketzülur kati züluba o lepshia pai, “Tetsür ka la temangji la meyong masü tashi la talenba nung lir,” ta ashi.