Tanur asoba nung Assam sorkari China nunger ama inyaktsü: Oxfam

Guwahati, April 26 (Agencies): Kibong ka nungi tanur ana dang asotsü asoshi Assam sorkari sentong yangluba ya terenlok nokdanger aser China nung tanur ka dang asotsü sentong yangluba ajanga ‘sex ratio’ meshidaki kümdaktsüba ama Assam nunga tensa tamajung ajurutsü, ta NGO telok Oxfam India-i ashi.
“Tetsürtem nem ‘education’ agütsüba tajungba küma yanglutsü, temang anema alitsü aser tanur asoba nokdangtsü asoshi teyari balala agütsütsü atema Assam sorkari temolung agütsütsüla. Tanga linük nung nütsüng tali renlokba nungi kümzüktsü asoshi item maparen ya dang inyak. Teshisadangba melei iba maparen tenzükra China nung tanur ka dang asotsü sentong yangluba ajanga ‘sex ratio’ meshidaki kümdaktsüba aser iba ajanga tanaben iba sentong raksaba ama ataloktsü,” ta Oxfam India indang CEO, Nisha Agrawal-i ashi.
Iba sentong ajanga tanur ana dak tali asortem, sorkar mapa inyaktsü memelar. Panchayat aser municipal election nunga shilem agitsü asoshi memelar.
“Iba amala sentong ya Madhya Pradesh, Rajasthan, Andhra Pradesh, Odisha aser Haryana nunga inyakdangogo aser item state nung election mapang candidate tem parnok tanur züngdanger ‘disqualification’ sütsü, iba ajanga tanur raksa indokba, tanur tangar nem agütsüba maparen timba aküm. Iba sentong ajanga lisopur temeden raksatsür. Anungji iba sentong ya Assam sorkari khen jungjunga bilemdangtsüla,” ta Agrawal-i ashi.
National Family Health Survey 4 (NFHS 4) ajanga bushitetba agi, Assam nung Total Fretility Rate (TFR) ya India indang TFR 2.2 aliba den kasa lir. TFR tajemba akümba ajanga state nung nütsüng tajemba kümdaktsür.
Education nunga Assam ya tajemzükba tia nung lir. Assam nung küm 15 nungi 49 tsüngda tetsürtem kaket shisatsü küm 10 tashi aser iba dak tali angazüka alirtem shilem 26.2 dang lir, saka India ajunga nungbo shilem 35.7 lir.
Sample Registration System (2011-13) ajanga bushitetba agi, Assam nung Maternal Mortality Ratio (MMR) ya lakh 1 nung 300 lir aser India nung ibai timba lir. India nung MMR ya 167 lir. Infant Mortality Rate (IMR) nunga Assam ya kanga aika lir. Tanur 1000 taküm asoba nungi Assam nung 48 bo süadoker aser India ajunga nung 41 asür.
Assam nung 2005-06 mapang Sex ratio 1033 liasü saka 2015-16 nung 929 kümogo.
Tetsürtem university tashi angati züngdaktsütsü sentong yangluba Assam sorkari sangdonga lir. Tanur ana dak tema alirtem sorkar mapa meinyaktettsü aser local election nung shilem magitettsü, ta iba kasa sentong nung inoka lir.