Tanur dak tashiyim agi shi nung medemer nem tasüba temerenshitsü agütsütsü akhanger

Yangtepnü (Bihostibar) ayaterm nung Congress tir Rahul Gandhi-i anir India Gate, New Delhi nung shimo milen tsükloka kasa onük atema lungkak aitba sentong ka agiba angur. 

New Delhi, Rongchii (April) 13 (Agencies): Jammu & Kashmir kübok Kathua nung arishi küm 8 tain tetsür tanur ka dak tebur telok kati tashiyim agi shi nung medemer tepsetba aser ano Uttar Pradesh kübok Unnao nung arishi küm 18 tain tetsür ka dak tashiyim agi shi nung medemba ken o tem atema nisung aikati item mapa inyakertem tasüba temerenshi agütsütsü atema takhangba agüja lungkak aiter.
Rogonü (Hokolbar) Chief Justice Dipak Misra-i aniba Supreme Court bench-i Kathua nung tashiyim agi shi nung medemba aser tepsetba ken o bushisüngdangtsü atema telemtetba agiogo.
Tebur telok kati tanutsüla tashiyim agi tepsetba den tepsetba ken o ya süoiki agiang ta lawyer temi CJI aser tanga judge lennirtem dang mepishiba sülen SC bench-i iba telemtetba agi. Lawyer temi iba tatalokba indang otsüji tezüluba nung Supreme Court nem agütsütsü ta ashi.
Supreme Court-isa Bar Council of India, Jammu and Kashmir Bar Association, Jammu High Court Bar Association aser Kathua Bar Association tem dang tai tonglokja alirtem anema chargesheet benoktsü noktangba atema tekümdangtsü osang metetdaktsü.
Women and Children Development Minister, Maneka Gandhi-ia tanü ashiba agi, lar department-i POCSO ozüng yanglushitsü aser arishi küm 12 teküpok tetsür tanur dak tashiyim agi shi nung medemertem tasüba temerenshi agütsütsü atema latettsü meranger.
Tanü Jammu nung Gujjar kini yimdong nung tanutsüla dak tashiyim mapa inyaker aser la tepsetertem tasüba temerenshi agüjang ta takhangba agüja lungkak ait.

Mumbai, Kolkata aser Bengaluru nunga kasa lungkak aitba sentongtem ayonga agi.
Iba ken o atema Congress-i Jammu & Kashmir Chief Minister Mehbooba Mufti dang lar cabinet minister anati Kathua tesem nung tensa raksatsü asü masü’ar osang tejangja metetdakjang ta takhangba agütsü.
BJP minister ana- forest minister Lal Singh aser industries minister Chander Prakash Ganga nati taoba ita Kathua kübok Rasana yimtsüng semdag aser tai tonglokja alirtem pusemba sentong ka nung aden ta osang angazüker.
Iba ken o nung tai tonglokja alirtem pusema agiba Hindu Ekta Munch rally nung shilem agiba atema National Conference-i Hiranagar block president Shanti Swaroop party nungi anentsüogo.
Ano külen, Uttar Pradesh kübok Unnao nung tetsür ka dak tashiyim agi shi nung medemba ken o nung police-i teinyaktsü meinyakba atema Allahabad high court-i tanü CBI dang BJP MLA Kuldeep Singh Sengar aputsü atema tetuyuba agütsü.
Allahabad high court-isa CBI dang tai tonglokja alirtem nem bail temelaba agüja aliba meyipa agitsü atema mapa inyaktsü tetuyuba agütsüogo.
Bangarmau MLA aser pa tenu nungertemi arishi küm 18 tain tetsür ka dak tashiyim agi shi nung medemba ken o atema yashi CBI-i FIR balala asem benoka liasü.
Tanü Delhi Commission for Women tanishir, Swati Maliwal-i ita trok tsüngda tanurtem dak tashiyim agi shi nung medemertem tasüba temerenshi agütsütsü atema ozüng yangluang ta takhangba agüja tanü nungi mapa telatet makai lumia lungkak aittsü tenzükogo.
Yashi Maliwal-i PM Narendra Modi dang takoksa ajuruba tetsürtem nem temeten agüjang ta shidi ka zülu aser tanü BJP lennir Yashwant Sinha-ia Rajghat nung la yaria lumiba nung aden.
Rogonü Parliament Street nung kaketshir aser tetsür telok balalai Kathua aser Unnao nung tetsürtem dak tashiyim agi shi nung medemba ken o tem atema lungkak aitba sentong ayongzüka agi.
Parnoki Prime Minister Narendra Modi dang kechiba item tatalokba atema ola madoker ta asüngdang.
Tanü lungkak aitba sentong nung All India Progressive Women’s Association, National Federation of Indian Women, JNU Students Union, Students Federation of India teloktem aden.
Yasüng ayaterm nung Congress tir Rahul Gandhi-i anir India Gate nung lungkak aita jajaba sentong ka ayonga agi.
Iba sentong nung tenu Priyanka, la kinungbo Robert Vadra aser Congress züngsemtem aden aser iba mapang Rahul-i aibenertem ozüng tesashi agi merenshitsü atema takhangba agütsü.
Rogonü (Hokolbar) Rahul Gandhi-isa Prime Minister Modi aija “Kechiba Modi-i tetsürtem anema inyakba tatalokbatem atema ola madoker?” ta asüngdang.
Prime Minister-i ola madokbaji magizüker aser India-i atadar, ta paisa shisem.
Modi-i ‘beti bachao’ (save the girl child) jembiba ama mapa nung inyaka sayutsüla, ta Rahul-isa ashi.
“Kechiba tetsür dak tashiyim agi shi nung medemertem aser nisung tepsetertem sorkari kümzüka ayur?” ta Rahul-isa Twitter nung Modi dang asüngdang.