Tanur ka dak nungi tepo 526 agitet

Chennai, July 31 (Agencies): Chennai nung doctor temi arishi küm 7 tain tanur ka tebang nungi tepo 526 tashi agitetogo.
Iba ya Saveetha Dental College and Hospital nung doctor temi kodanga meinyakdangba surgery ka nung agitetba liasü.
Tanubosangji “Compound Composite Ondontoma” agi timtemer aser teküm achijilen waker mozü kidangi anir aru.
Tanubosangji arishi küm 3 asüdang par tsüraburtemi pa teküm awakbaji ajitet saka kangabo mawakba agi zübazüba dang toktsü, ta Department of Oral and Maxillofacial Surgery Professor P Senthilnathan-i ashi.
“Tesülen teküm tuluba awakba agi tsüraburtemi tanubosangji mozü kidangi anir aru” ta paisa ashi.
Tanubosang indang teküm achijilen onoki X-ray aser CT-scan agidang tepo talila aika aliba angu aser iba sülen doctor temi surgery agitsü lemtet. Onoki tekümji lapoker reprangdangdang, taseptsü tanak ama ka nung tepo 526 aliba angu. Taseptsü indang touzükji gram 200 shi liasü” ta Senthilnathan-isa shisem.
“Tanubosang dak surgery agir anogo asemnü lir pa junga kümogo” ta Oral and Maxillofacial Pathology Professor aser Head of the Department, Pratibha Ramani-ia metetdaktsü.
Alima nung nisung ka dak tepo teimba aliba ngutetbaji iba ta asütsü ta doctor temi ashir.