Tanur ka tashiyim agi raksatsüba nung tai tongloktsüsang tepset

Dimapur, July 15 (TYO) : July 14, 2015 aonung 8:00 ako meta Dimapur Police dangi tila tanur ka tashiyim agi raksatsüba aser iba tatalokba nung tai tonglokja alisang tepsetba ken o benok ta ADCP/ PRO, Dimapur Police-i sangdong ka ajanga metetdaktsü.
Iba lendong ya Dhansiripar Outpost kübok Khekiho yimtsüng nung atalokba liasü.
July 11, 2015 nü Khekiho yimtsüng nung alir tsümatsür tanur ka sama aser iba dak sendakba nung July 14 nü bushitepa aodang tanutsülaji Lhotavi yimtsüng nung Hussain Ali’er kidang pur yua aliba metet, ta police-i asüngdangya asüdang angazük.
Arishi küm 35 tain Hussain Ali ji asür Qutub Ali’er jabaso lir aser tanutsüla par kidang anguba sülen pa Khekiho yimtsüngi anir ao.
Kinüngertemi asüngdangya asüdang Hussain Ali-i la pur ayuba mapang la tashiyim agi raksatsü ta tanutsülai kuli agütsü.
Ano külen, Hussain kinüngtsüji mashisa lir aser la kinungboi tanutsüla dak tashiyim mapa meinyakdaktsütsü asoshi lai raraba agi la kinungboi la kima nung alena ayuba sülen tanutsüla tashiyim agi raksatsü, ta kuli agütsü.
Iba osang angazükba sülen tanutsülar kinüngertem den nisung kari tejashi nung Hussain Ali dak teka sangshi. Idangji yimtsüng nung taintem aser tangartemi lendong ajitetba agi Hussain ji Dhansiripar Police Outpost nung oa agütsütsü ani apuso saka pa len tom nung asü, ta ADCP/ PRO, Dimapur Police sangdong nung shia lir.
Police-i Hussain mang reprangdangdang pa teka, tetsüng aser teberem nung zübo kar angu saka pa tejak aser tekolak nungbo zübo maliasü. Post Mortem osang ano mangu lir saka pa temang telunglen mejungi yiruba ajanga asüba asütsü akok ta temulung malemer, ta sangdong nungsa shia lir.
Police-i iba tatalokba atema ken o ana benokogo aser kaji tetsür tanur tashiyim agi raksatsüba aser ka nisung tepsetba lir.
Nisung tepsetba ken o nung police-i nisung ana dak tai tonglokja puogo aser tenaji Abdul Shahid aser Hatim Mia na lir. Ano maneni bushisüngdanga aodang nisung kar aputsü imlar, ta ADCP/ PRO, Dimapur Police-i metetdaktsüogo.