Tanur kar merang agi alener puoka ayu

Los Angeles, Jan 15 (Agencies) : California nung tanur ter asem pua yur reshikangshiba aser karbo yipden nung tetsüng-teben merang agi alener ayuba atema apuani na pua lir, ta ketdangsertemi osang ka metetdaktsüogo.
Taoba Deobarnüto arishi küm 17 tetsür chanu ka parnok pua aliba kidang nung jagi jena oor kidangji anguba cellphone ka nungi 911 nung call ser osang agütsü; iba sullen parnok reshikangshiba kuliji bushisüngdang tenzük. Tang apuani na nemji sen US dollar million 9 bail atakzükja lir.
Officer-temi ashiba agi, kanga dang kongrasüker asünung laji tereprangtsü nung arishi küm 10 shi dang asütsü amai bilem.
California kübok Perris nung aliba ki ka nung parnok ter asemji puoka liasü aser parnokji arishi küm 2 nungi 29 tsüngda liasü, ta Riverside County Sheriff Department ajanga metetdaktsü. Pua liasüba tanurtem tenüngjibo mashi.
Kasa osang ajanga ashiba agi, “Tanurtemji aika yipden nung merang agi alenersa ayu aser tesem temeketji kanga dang teshinem menema liasü ta bushisüngdangba sülen jangjaogo; kechi tebilemba nung parnok yamaji timtema pua ayuar tanur reprangba apuani jagi kuli tejangja mashi.” Kanga dang taoksatsüka puoka alirtem rongnungji par tenetbo teintet liasü; parnokji arishi küm 18 nungi 29 tsüngda liasü, ta angazüker. Sepai office ajanga ashiba agi, parnok lumiseter ta ashiba sülenang parnok nemji chiyungtsü aser tajemtsü agütsü.
Nisung reshikangshia amshiba aser tanurtem timtemdaktsüba nung ajemdaker arishi küm 57 tain David Allen Turpin aser pa kinüngtsü arishi küm 49 tain Louise Anna Turpin na anema keno benoka lir.