Tanur kija kidang metoktsütsü ozüng yanglur

Houston, Jan 22 (Agencies) : India tsür arishi küm asem tenüng agi Sherin Mathews temeimtsüka taküm samaba nung ajemdaker US state , Texas nung tanur kija kidang metoktsütsü atema ozüng tasen ka yanglutsü merangdagi aser iba ozüng dangji “Sherin’s Law” ajatsü bilemdagi, ta osang ka ajanga metetdaktsüogo.
India nunger agi America senso kümer alisang Wesley Mathews-i Sherin-ji par chir kümer mesüa liasü (foster parents). Tebui par jalaji samaogo ta osang agütsür hopta ana dak tema lir Sherin tasümangji taoba October 22 nü Dallas yimti tezülen Richardson kübok kilentzü ka nung angu.
Tang ozüng akümtsü atema renemdanga aliba ‘Sherin’s Law’ nung shia aliba agi, tanur chanu ka kidang kija yutsüra ozüng anema aibelenba tulu asütsü, ta WFAA television station ajanga sangdongogo.
Richardson Police-i ashiba agi, October 6 nü pa, kinüngtsü Sini aser chichiba tanur dena chiyungi oadok aser iba mapang Sherin-ji la kija kidang toktsü, ta Wesley-i asüngdangyaba mapang ashi.
Mezüngbo Sherin dang mamatzü jemang ta ashinung lai tashi mangaba agi par kima anepdang 3:00 ako meta süngdong ka anasa nokdaka yutsü, ta Wesley-i sepai dang tiyazü ashi. Ano Sherin tasümang anguba sülenbo la mamatzü ajemdang arakset, ta tiyazü otsü yanglur ashi.
“Sherin dak atalokba sülen ojang dang asütsü, Ozüng tanga ka melenshitsü mapang tongogo,” ta tila tanur temeten atema jembitsür okatsür ka tenüng agi Reena Bana-i metetdaktsü.