Tanur mapa inyakdaktsüra küm 2 jail nung ayutsü, senchi 50,000 achitsü

New Delhi, August 01 (Agencies): Tanur kati school senshiba sülen mesüra sodi mapang pei kibong nung yaritepa mapa inyakba dak alaka arishi küm 14 ser tekübokpur mapa (mapa tapu mashii) inyakdaktsüra küm ana tepoukdaki yoktsü, aser senchi 50,000 achitsü atema Hokolbarnü Parliament nung bill ka agizüka liasü aser kasaji Tir, Pranab Mukherjee-i agizükogo.
Kasa bill ajanga arishi küm 14 nungi 18 tsüngdapurtemji ‘tainlonglong’ purtem lir aser parnokji nagmati atuba, mi aser tapoktsü lendong aketba mapa ama timtem adokdaktsüba mapatem inyakdaktsütsü memelar.
Ajisüaka tanurtem film, advertisement mesüra television industry nung inyakbabo iba ozüng küboki maiter.
Tiri Child Labour (Prohibition and Regulation) Amendment Act, 2016 agizükogo aser iba ozüng metetdaktsüogo, ta sorkar ketdangsertemi ashi.
Iba ozüng tasenba ya Child Labour (Prohibition and Regulation) Act, 1986 yanglushiba lir, aser iba ozüng ajanga mapangmapang shia tanurtem mapa inyaktsü memelaba tesemtem mita senzütsü sorkar nem tashi agütsür.
Lok Sabha nung iba bill July 26 nü agizük. Rajya Sabha nungbo iba bill ya July 19 nü agizüka liasü.
Tang nungi tanurtem mapa inyakdaktsüba nung aibelenertem atema temerenshiji- ita trok nungi küm ana (ita asem nungi küm ka) tepoukdaki yoktsü mesüra senchi sen 20,000 nungi 50,000 tashi (10,000-20,000) mesüra temerenshi anaprong agütsütsü.
Tanaben kasa aibelenertem tepoukdak küm ka nungi küm asem tashi ayutsü, ta iba Act nung shia lir.