Tanur meshitetba

Tsüngremibo nisung ya pa mesükba nung yanglu saka Tsüngrem mesükba nisungi tai menanungji asenok ajak ya Tsüngrem memesüki kümogo. Ibayongji, asenok ya tanüla nung meshitet nungang tanaben Tsüngrem mesüka akümtsü. Iba tangatetba nung nisung ka sor ano tanüla nung tanaben asotsü nüngdakba indang jembir. Iba kasa tangatetba nung tanur sor külen kinü asüdangyongi arogo nung putiri meshiteta sarasademtsür. Aji oda, asenok Ao Baptist arogotem nunga arogotsürtemi sentep sentong tajung yanglua pei arogo nung asoba kinü tanurtem ajak tenla kidangi anir arudaktsür meshiteta sarasademtsüba den külemi certificate-a agütsür. Atangji, ibaji arogo nung inyakyim tajung ka lir aser iba jagi tanurji tain kümer pa mesüra la kinü asüdang Tsüngrem tenzükertemi meshiteta sarasademtsüogo ta metettsü. Iba jagi pa mesüra la mulungjangi tangatetba tajung ka arua nisung tajung akümtsü asoshi jembitsüa akok. Iba nükjidong aser teimla nung tanur asoba kuli kaketji agütsür südi. Ajisüaka, tanü lima ya tejakleni aoba lima dang masü saka tebenja lima, anungji akhidang bentetbenteta inyaka oa aliba maparen kato tanübo moutettsüsa akümer. Iba amaji tanur abenba aser asoba maparen nunga tanübo temelenshi aika ataloka lir. Akhidangbo, kibong kümer tanur metanglokra ojang, kecha teimla mali liasü, saka tanübo tanur malir apuanitema mozü kidang oagi doctortemi temang repranger tanur abentsüsa anepalutsütetter. Tanur mabenba timtem ya aiben asenoki tetsürtem dak tongloktsür saka tanur mebentetba timtemji karbo tebur dak alir. Item timtem ajakji mozü kidang iba ama timtem repranger doctor mongintemi repranger külen tanur mabenbaji tebur dak maliba agi mabener süra tangar tebur dak nungi tanur abenba tzü agizüka tetsürla (kinungtsü) nem enoktsür bendaktsür aser ano tetsür dak timtem aliba ajanga tanur mebenteter süra tebur (kinungbo) dak nungi tzüji agizüka tangar tetsür ka nem bendaktsür aser tanurji sor meyipa meshir. Item ajakji tanur mebentettsüsa timtem ajurur kibongtem asoshi temoatsü ama züngshia agizüker. Tanü arogo nung tasüngdangba kaji, item tanurtemjia shitakba tetsü aser tebu zü nungi shitak asoba tanurtem den kasa züngshitsü asü mesüra parnok nemjibo tasoba kuli kaket magütsütsü (?) ta asüba tasüngdangba ya lir. Atangji, tanur asoba yimyaji itemji dang masü saka ano arogo ajanga timi temeshi kiyimba kulizüng agia kibong akümertem o arogo majangi kibong akümer kibongtem nung asoba tanurtem rongnunga arogoi bendanga amshitsü asü ta asüba tasüngdangba aser tebilemtsütemji lir. Ibayongji, tawa arogo ka nung tanur meshiteta sarasademtsüba sentep sentong nung shitakba tetsü aser tebu na zü ajanga shitakba tetsüi asoba tanur nem dang tasoba kuli agütsütsü ta sangdongba onük nung ken o kanga buluogo. Iba jagi aika temulung yirur aser aikati shitaka asür. Ibayongji, iba ama tanü putu dak aketba maparen ajanga arogo nunga mepelatep madoktsü asoshi tangatetba kati arudaktsünüa, ABAM kübok aliba arogotem nung kinü tanur meshiteta sarasademtsüba sentep sentong nung certificate mamshi nunga koma süla ? ta asüba tasüngdangba nung asenok shisalemsatepogo. Iba tasüngdangba langzürtem rongnunga teimbakati sarasademtsüba dak alaka certificate-bo magütsüyonga kecha masü ta shidangogo. Atangji, koba yimya nung asoba kinü tanur südir süang, paji temenen nung aso, anungji meshiteta sarasademtsütsübaji kanga nüngdaker, anungji sarasademtsütsüla. Ajisüaka, sarasademtsür külen kar nem certificate agütsü aser kar nembo magütsü ta asübaji sarasademtsüba denji meputeper. Ano, telangzürtemi ashiba ama, kinü tanur nem arogoi mesüra arogotsüri tasoba kuli kaket agütsübaji kangabo nüngdak madoktsü. Arogo ajanga kibong makümyonga arogo nung agizükra tsüraburtemji kasa tamanger akümer. Ano, shi nung memedemi tangar teyari ajanga asoba tanurtemjia tangar tanurtem dang nungi temenenba ta masü, ajakji lenmang ka nungi mesüra ka nungi Tsüngremer nükjidong ataloktsü asoshi moatsüba tanur ta asenoki sasasadema agizüktettsüla. Iba tangatetba nung tsüraburi aser arogoi tanurtemji sarasadema anitetra, parnokji Tsüngremer yimli nung ketdangser tajung kaka küma aientsü.