Tanur nem gari anishidaktsüba

India nung tang reprangteta tejembidak tebilemtsü kaji tanur nem gari anishidaktsüba tebilemtsü ya lir. Talisa, tawa Delhi nung tanur kati aniba gari kati nisung ka tsüksetba sülen iba tebilemtsü ya yimsüsürtemi kanga shisabolua jembi tenzükogo. Atangji, tanur nem gari anidaktsüba jagi tangar dang masü saka gari anishisang tanubusang mesüra tanutsülajia lendongi idaktsütsü. Gari ya tajung saka ibai lendong aketba oset ka lir, anungji tanur nem gari anidaktsübaji shitakba nungbo yiar mapa ka asütsü. India nung ozüng agi arishi küm terti teküpbok purtem nem gari anishitsü temelaba magütsür. Ajisüaka, aikati iba ozüng kübok meliteti inyakba ajanga aiben lendong atalokba reprangteta tang ano ozüng tasen takangba ka yanglutsü asoshi state sorkar shia nungi tebilemba bendena ken o lemteptsü atema senden ka ayongzüka lir. Tawa Delhi nung atalokba lendong nungbo gari anishisang , shibai nisung ka tsükset, iba tanubusangji dang masü saka tebu dena police-i apuba osang asenoki angashiogo. Iba ama tatalokba jagi anojungi gari anishir tanurtem dang masü saka tsüraburtem dena khuret abentsüsa tangatetba agütsür. Linük nung iba tebilemtsü indang kanga süoki ia jembidang, tanga state-tem dang nungibo ano Nagaland nungsa lendong taketba amato tanurtemi gari anishiba angur. Asenoki aiben tanurtem nem gari anishidaktsübaji takok tuluka amato bilemer, kechiyong tanur kati gari anitetbaji atamata masü. Ajisüaka, iba takokji mapang memeshidangyongi aritepa an akongba mesüra süngjang atangba nung tsüraburtemi lendong keta ali takzüba ama asenoki bilemdi. Ozüng latetertemi tanur nem gari manishidaktsütsü asoshi latetbaji tapi agibo masü. Nisunger yimya nung tanur asüdangbo yima otettsüla amato bilemer, anungji akokba tashi karaa aotsü bilemer. Ibaji dang masü saka tanur shisatsü nung pa yirutsüa tsübua mali aser tangar yirutsütsüa shisabolua mebilemer. Ano Nagaland nung balaka tebilemtsü talila ka lir, ibaji tanuri yi jemer gari anir. Iba yimobilem züluri Dimapur nung Police officer ka den iba tebilemtsü indang jembidang, kibong nung tsüraburtemi iba tebilemtsü ya kanga süoki ia bilema jembitsü nüngdakba indang metetdaktsü. Iba police tanishiri ashiba agi, Nagaland nung gari anishi memeshi asangur aser aiür chanu aikati gari anishiba ajurur aser item jagi aiben yi jemer anishir. Itemji pua yur tsüraburtem ajar aser tarütsü aser tajungshi o tajung shir yoker, kechiyong tanurtem tarutsü tia raksatsüsa tepuokdakbo meyuner aser parnok taküm anojungia mesamadaktsüner. Item shisaboluba maparen ajak nungji, dennüyonga medennüyonga tsüraburtem dena lir. Iba ama lendong aketba mapa tanurtemi inyakba nungi tsüraburtem ajentsü makok. Alima nung nisungtem tesünep nung alitsü aser lendong nungi kümzüktsüsa ozüng aika lateta lir, saka item ozüngtem kübok tashi angaa alitsü asoshi tangatetba agütsüba rejujibo kibong dang lir. Item ajakjibo kaketreju nung mesayur. Aji oda, tanurtem dang gari anishitsü sayutsübaji dang masü saka gari yanglutsü dena sayutsübajia kanga tongtibang mapa ka asütsü. Ajisüaka, mapa shia teinyaktsü mapang kaka lir, anungji taküm shia nung iba mapangji meteta inyaktsübaji ajak atema kanga tenüngdaktsü asütsü. Tanü asüng balaka mapa aika nung tetsür tebur kecha tebendang mali inyaker. Aji oda, asen lima nunga tetsürtemiang gari tajungba anishiba angutsü. Ajisüaka, item temelenshi maparen ajunga nungji mekümdangra lendong lir. Atangji, item lendong timtem nokdangtsü asoshi ozüng latetter aser item ozüngtemji mapa  küma benshia aotsü atema police-tem ayur. Ajisüaka, nisungtem dak tangatetba melira ozüngji mapa küma mamshitettsü. Ashiko, tangatetba melira ozüng raksartem azüoktsü melen police-temiang peisasa pei mazüoktet inyaktsüa akok. Iba amaji tsüraburtemiang tanurtem dang tamajungba benshitsüa akok. Item tebilemtsütemji ajak kokteta, pei lima topur junga ayutsü asoshi senso shia teinyaktsüji ozüng kübok alitsüla aser tanur shia ozüng kübok alitsüsa tsüraburtemi pei kibong nung sayutettsüla.