Tanur raksatsürtem nem tasüba temerenshi agutsütsü atema bill benok

New Delhi, Chiteni/July 30 (Agencies): Arishi küm 12 ser tekübok tetsürtem tashiyim amshia raksatsüba ken o nung aibelenertem nem tasüba temerenshi obendang agutsütsü atema tanü Lok Sabha nung bill ka benokogo.
Iba bill ji agizükra iba jagi Criminal Law (Amendment) Ordinance melentsü. Taküm Jammu & Kashmir, Kathua nung tetsür chanu ka tashiyim amshia raksatsüba aser Uttar Pradesh kübok Unnao nung tetsür ka raksatsüba sülen tashiyim amshia takum raksatsüba nung aibelenertem nem temerenshi agutsüba ozüng yanglushitsü atema benoka liasü.
Lok Sabha nung züngsem aikati Criminal Law (Amendment) Bill 2018 agizüka liasü, ajisüaka ozüng akumtsü atema sorkari ordinanace ajanga benokbaji Opposition nung karibo ashishi.
Iba bill nung o lemtepba sülen agizüktsü atema bill benokdang Minister of State for Home, Kiren Rijiju-i, iba ozüng tesashi ya tetsür chanutem kümzüka alitsü nükjidong nung lir, ta metetdaktsü.
Tawa arishi küm 12 ser tekübok tetsürtem taküm raksatsüba ajanga linük tesem ajunga aoksadaktsüogo, anungji item ama ken o nung aibelen masütsü atema ozüng tesashiba nüngdak, ta paisa ashi.
Iba bill ajanga tashiyim amshia taküm raksatsürtem nem temerenshi tulu agutsütsü, talisa arishi küm 12 ser tekübok tetsür chanu raksatsürtem nem tasüba temerenshi agutsütsü atema obendang agutsütsü.