Tanur smartphone onsara amshiba agi tenük perepdaktsür

London, April 22 (Agencies) : South Korea nunger doctor telok kati tanur arishi küm pongu matong tsüngda smartphone onsara amshidaktsüba ajanga tenük nung timtem adoktsüba putetogo.
Telegraph osang ajanga ashiba agi, tanurtem nem smartphone onsara tali amshidaktsüba ajanga parnok tenük perepa kümdaktsür ta Seoul nung Chonnam National University Hospital nung inyaker doctor temi putetogo.
Tenük perepba (Strabismus) ajanga nisung kati tenük ana prongla anema alirtem mesüka tenük anatsülen kanga junga timi marakzüteter.
Iba tashidak agi atongertemi indang idanga reprangba mapang tenük ana rongnung ka alilen, azüklen mesüra tezülen repranger ama angutsü.
Tanurtemi smartphone amshidang parnok tejak nungi phone ji inch 8 nungi 12 tashi dang pilar amshir, ta doctor temi ngutetogo.
Parnoki, tanur tenük pereper alir parnok 12 nungi 9 tashibo ita ana shi smartphone amshiba anendaktsüba ajanga jungogo, ta ashi.
Asenoki smartphone amshi dang khen nung minute 30 dak tema phone dak rangloka mereprangtsüla, ta bushisüngdangertemi metetdaktsüogo.
“Tanur shiba dak ibala mesükba timtem agi tongdir indangjisa doctor dang sayutsüla,” ta doctor temi ashi.