Tanurtem dak zükra tesayur dang senchi achitsü

New Delhi, July 25 (Agencies): Central Information Commission (CIC)-i, tanur ka dak züka  temerenshi agütsüra school aser tesayur dang senchi achitsü, ta metetdaktsüogo.
Commission-i Kendriya Vidyalaya Sangathan (KVS) dang tanurtem züka merenshiba atema ozüng inyakyim benoka ali asü mali, ta asüngdangba den külemi item ama tatalokba osangtem aser taküm küm tenzüker ita asem tsüngda senchi achiba osangtem meshiogo.
Linük nung Kendriya Vidyalaya school 1,099 shi lir aser iba tetuyuba ajanga item school tem kongshitsü.
Commission-isa CBSE aser ICSC school Boards dang school tem nung tanur dak azükba temerenshi reprangtsü aser bushisüngdangtsü atema committee tentetang, ta shiogo.
Pilibhit nung Kendriya Vidyalaya tesayur, Yagya Dutt Arya-i kaketshir ka dak azükba atema bushisüngdangtsü asoshi Bhramanand Mishra-i RTI benokba sülen Information commissioner, M Sridhar Acharyulu-i iba tetuyuba tasen agütsüogo.
National Commission for Protection of Child Rights (NCPCR)-i tanurtem dak züka merenshiba anema latetbatem den kasa KVS-i latettsüla ta tuyua Acharyulu-i, “Ibaji ajanga school ji azükba aser maksütsüba tesem ka masü saka sademsadema angazükba tesem ka akumtsü,” ta ashi.