Tanurtem film benjungmung tenzükogo

October 9, 2018 nü RCEMPA Auditorium Jotsoma nung Nagaland Children’s Film Bonanza sentong lapokdang Chief Minister, Neiphiu Rio-i Mhonbeni Ezung nem Tasütait Sempet (Bravery Award) agütsüba noksa angur.

Dimapur, Mongputeni (October) 9 (TYO): Anogo pungunü atema Nagaland Children’s Film Bonanza benjung tanü nungi tenzükogo.
October 9, 2018 nü RCEMPA Auditorium Jotsoma, Kohima nung Nagaland Chief Minister Neiphiu Rio-i benjung lapokba sentong nung mejeta jaoker ka ama shilem agi.
CFSI chairperson Swati Pandey, IPS, Minister, Advisor aser tangartem lia tanü “Nani Teri Morni” film saya.
Children Film Bonanza ya October 9 nungi 13 tashi amungtsü aser anogoshia 10 ako, 12 ako & nikongtsütsü 2 ako nung film tem sayutsü. Iba benjung indang omenji “Promoting Every Child’s Right to Entertainment’ lir.
Tanü Chief Minister Rio-i Nagamese film “Nani Teri Morni” mezüng sayatsüdang CFSI nem tenüngsang agütsü.
“Iba ama film festival ajanga kaketshirtemi maongka angur aser cinematography yimya nung otsütem ajanga parnok ajungmesor” ta Rio-i ashi.
“Nagaland nung tangokba mezüngbuba Nagamese film sayabaji kanga dang tongtipang mapang ka lir. Iba film ya National Bravery Award, 2015 angur Mhonbeni Ezung indang otsü nung ajemdaker yangluba lir. Lai tetsü kümzükba otsü ajanga yangi sentepa aliba kaketshirtem ajungmesotsü” ta paisa shisem.
Rio-isa film nung shilem agirtem aser yariteper ajak nem tenüngsang agütsü.
Children Film Society, India Chairperson, Swati Pandey, IPS-i o jembidang, Nagaland Chief Minister Neiphiu Rio aser state ketdangsertemi state nung children’s film festival yaria nungitba atema pelaba metetdaktsü.
‘Nani Teri Morni’ film ya Nagamese oshi nung yangluba film lir aser iba otsü nung kin mesüra tebur o tetsür telemsa melii tasü aitba indang osang prokshir, ta Swati Pandey-i ashi.
Laisa state sorkar dang Children’s Film Festival ya kümshia ayonga amungba benjung ka südakjang ta mepishi.
Mhonbeni Ezung ya bravery award angurtem rongnung tanutsüla lir aser la tasü aitba ajanga tanur aika ajungmesotsü, ta Swati-isa metetdaktsü.
Tanü benjung lapokba sentong nung mendenji Neingulie Nakhro liasü aser Harmonic Voices-i ken ka aten.
Iba benjung ya Social Welfare, Art Culture, Youth Resources & Sports, School Education and Information & Public Relations, GoN yaritepa ayongzüker. Benjung nung sorkar aser nija school tem nung class V nungi class XII kaketshirtem adentsü.