Tanurtem meyong magitsütsüla

Asen lima nung kenü tsünglu aruba anogo ka tebur tain ka tsünglu arudang asemba tula ‘rain coat’ ka semer alui ooya lia school tanurtemi ajurua sot aser parnoki pa dang tulaji meshi. Idangji, tebursang jagi süngmangseta tanurtem dang pai asemba tulaji magütsütettsü ta ashi. Ajisüaka, tanurtem jagi pai asemba tulaji pa asemtsü yokba masü saka school tanurtem asemtsü yokba tula lir, anungji pai ibaji masemtsüla ta arrtsü meso. Iba tebursang keti iba tulaji kodaser aruar mejangjatetter saka iba iba tulaji School Education department nungi SSA sentong ajanga sorkar school nung azünger tanurtem asoshi yokba tula liasü. Rain coat-ji dang masü saka sorkar school nung azünger  tanurtem asoshi kaket abentsü yangku den tula süoshi aser chiyongtsü dena center nungi angati agütsür. Ajisüaka, tanur meyong rain coat semer alui aoba amaji tanurtem süoshi aser chiyongtsü alitsüba sen agi asenok taintemang nüngdak meperir. Shitakba agibo kaketreju nung yur tanurtem dang  kanga nendaka sayutsü asoshi sorkari computer agütsü saka ibaji tain kati pei kidang bener oa ayutsü. Shitakba agibo, tanurtem nem anüngdang chidaktsütsü asoshi mamatzü aser amtsük teperi yimtsüng, mepu aser kiyong shia bener yoker saka item amtsük aser mamatzüji school nung tanurtemi mangur. Itemji taintemi achir aser taintem karibo tanur chiyongtsütemji azü nem agütsür. Tangar tanur aika tsürabur makamaitba agi anepdang chi junga mechiyongi schooli yoker, anungji item nemji chidaktsütsü asoshi School Education aser Social Welfare department-tem ama nungi jang, dal, shini mamatzü aser amtsük agütsür. Ajisüaka, item tanur chiyongtsütemji taintem kari sen kümer pei meyong rongsen akümer aser kari pei kidang azü nem agütsür.Itemji dang masü saka school tanurtem nem angati tazüngtsü kaket aser tula süoshi agütsütsü aruba senotsü teimbaka taintemi miimzüka agiadoker. Itemji tebur tain  kati school tanur asemtsü asoshi yokba rain coat alui semer aoba amaji lir. Iba kasaji tesem aika nung tanurtem  asoshi yokba amtsük aser mamatzü agi yangluba kiojen aser farm dena alitsüa akok. Iba amaji tanurtem asoshi yokba tazüngtsü kaket aser süoshi agi yangluba kiojen aser ali rongsen tesem tesem nung alitsü. Kaketreju nung tanurtembo timatemer, parnok asoshi Delhi nungi yokba teyari Kohima atongdangbo aika samar atonger aser Kohima nungi pei pei district aser sub-division-i yokdangbo oset aser chiyongtsü masü saka tezüluba kaket dang atonger. Aji oda, sensaker tanurtem schooli tsünglu ajaa maotsü asoshi agütsüba ‘rain coat’ taintemi alui semer aoba shisatsü memelen tashi tanurtemji kanga timatemtsü aser taintema jangratema malitsü. School tanurtem meyong amtsük aser mamatsü agi taintem takar akümtsü merangba shisatsü memelen tashi tanurtem kanga timatemtsü aser taintemji tesensakba dang akümtsü. Taintemi tanurtem azüngtsü kaket aser tula süoshi shitak magütsüi tanurtem tenüng nung pei ajangzüktsü bilema inyakba shisatsü memelen tashi tanurtem kanga timatemtsü aser taintemjia timtem ajuru manentsü. Tanurtem meyong rakzüka yangluba kidang taintem anisüngzüka malitsü.  Tanü asenok taintem rongnung kari danga school tanurtem achitsü chiyongtsü, agitsüba süoshi aser azüngtsü kakettem agi sen kümer pei agitsü inyaktsü bilema lira, bilemdangang, ibaji magishitsü. Iba lima nung tanurtem aser sensakertem dang nungi rakzükba rongsen agi shinga azükaru masütsü. Item rongsemtemji asenoki repranga lia anüng ozü ama yimshia aotsü aser khen nung mali akümtsü. Nisung kari item rongsentem bendena takar akümba agi pei semchirsemnurtem alima mesama tashi takar küma jangratema alitsü amai bilema inyaktsü akok. Ajisüaka, item rongsentemji pei taküm lia pei nük agi ngua samatsü. Atangji, alima nung kotak tenyar amabo melitettsü saka ano moijing amaia malitsüla. Aji oda, Tsüngrem mesükba nung yangluba ama, nisungi nisung mesüka ochishia lira, ibajisa tajungba. Tanü asenoki tanurtem meyong rakzüktsü melen parnok ajak tajung kümdaktsütsü bilema asenokiang enoksema parnokji anepalura, asüng asen lima mejungli asüyonga ajungtsübasa ta bilema inyakdi.