Tanurtem nem kaket züngdaktsütsü tangatetba lir: Ruskin Bond

New Delhi, August 03 (Agencies): Tanü putu nung tila tanurtem nem kaket züngdaktsütsüji mapa temela masü saka tanurtem nem kaket züngdaktsütsü tangatetba tajung tsüraburtemi angutsü tenzükogo ta nüngtugu kaket zülur, Ruskin Bond-i metetdaktsü.

“Tila tanurtem atema kaket züluji khuret tulu lir kechiyong parnoki jangraba onük mesüra otsü mesüra parnoki kaketji mezüngi oda yutsür,” ta tanü tashi nung kaket 150 dak tema zülua alisang, arishi küm 81 tain Ruskin-i ashi.

Landmark bookstore-i tenzüka ‘Child Reading to Child’ mapatong kübok shimtetba tanur 5 den ajurutepba sülen osangbener den sensak asemdang Ruskin-i iba olen ya lemsatepa liasü.

“Tanü putu nung internet aser iba amala technology balala den sentakba osettsüset amshiba yong tanur rongnung kaket azüngtsü yimya tenteta mali ta aikati jembir. Ajisüaka, kü lanuwa mapanga television aser internet tang ama meliasü saka iba mapangjia tanurtemi kaket azüngtsü mejangrai aliba bilemteter. Anungji, tanurtemi internet amshiba ajanga kaket azüngtsü mejangrar masü,” ta taruba September ita ‘Rusty & the Magic Mountains’ kaket sayatsü renema alisang, Ruskin-i ashi.

“Kaket menünga adoktsürtemia tila tanur indang kaket adoktsü maparen nendaka inyaktsü tenzükogo,” ta shia, taoba küm ishika tejaklen nungi tenzüka tila tanurtem atema kaket tabu jenti adoktsü tenzükogo ta pai metetdaktsü.