Tanurtem nem tatidang metsübudaktsütsüla: Dr. Zavise Rume

Kohima, April 22, 2022 (TYO): Hokolbarnü Nagaland nung Pariksha Parv 4.0 ayongzüka mongogo. Iba sentong ya Nagaland State Council of Education Research & Training-i State Commission for Protection of Child Rights (SCPCR) den yaritepa ayongzük.

“Pariksha Parv ya tatidang atema pelatsüba aser tatidang atema khuret abenba aser shisabuluba tangatetba agientsü atema ayongzüka amonger” ta SCERT Counselling Cell Professor Dr Zavise Rume-i “Joy of Examination” onük jembidang ashi.

Tesayurtemi tatidang ya sensaksemba sabang ka kümdaktsütsüla aser tanurtem dak nungi tatidang asoshi khuret abenba agientsüla ta paisa ashi.

“Tatidang ya counselling atema kanga tongtipang lir aser iba ya shisaliok alizüngtem aser nükjidongtem yangertsü atema agir sernung asenoki aibelena kaketshirtemi shia metetba indang obendangtsü agir aser iba jagi kaketshirtem nem tatidang tsübudaktsür” ta Dr Zavise Rume-isa ashi.

Nagaland aser India nung shisaliok ya ‘exam oriented’ lir aser nisung aikati tatidang melira shisaliok malitsü ama bilemer, saka asenoki kaketshirtem dak nungi shisabulutsü agientsü atema inyaktsüla ta paisa shisem.

“Tesayurtemi kechi sayu iba shitakji zülutsüba masü saka kaketshirtemi parnoki shisateta zülutsüba nung temolung agütsütsüla. Kaketshirtem atema examination marks agütsür anungji tesayurtemi marks shitak agütsütsü asoshi menungnangtsüla” ta Dr. Rume-isa metetdaktsü.

Kaketshirtemi tatidang agiba sülen ang shisabulur ta Social Welfare Department Joint Secretary aser SCPCR Nagaland secretary K Mhathung Tsanglao-ia ashi.

“SCPCR Nagaland ya 2013 küm National Commission for Protection of Child Rights Act 2005 kübok tentet aser tanurtem indang temetentem atema inyaka arur. Tanurtem indang temeten kümzüka ayuba ozüngtem rongnung Juvenile Justice Act and Protection of Children from Sexual Offences Act dena lir” ta Mhathung Tsanglao-isa metetdaktsü.

National Commission for Protection of Child Rights (NCPCR)-i tatidang indang shisabulu agientsütsü atema April 11 nungi May 31, 2022 tashi Pariksha Parv- 4.0 amongtsü.

NCPCR-i 2019 nungi ‘Pariksha Parv’ mongyonga arur aser iba ya kaketshirtemi tatidang metsübutsü aser exam results madokdang parnok temolung anisüngzükdaktsütsü atema ayonga amonger.

Tanü agiba sentong nung mendenji SCERT Counselling Cell research assistant Medemmongla Jamir liasü School Counselling SCERT Trainee Diploma Jenny Kath-i tesentepertem pelaa agizük aser trainee Vesekho Khesoh-i anküp tepela o jembi.