Tanurtem timi anitetang

– Among P. Aier

Asenoki tanurtem tila asüdang Yisu Khrista sülen anidaktsü mesayura, alimai parnok dang Yisu sülen manidaktsü sayutsü. Anungji tsüraburtemi tila tanurtem Tsüngrem o nung anitettsübaji kanga tongtipang, yamaji meinyakra pa/la taküm amajok nung dang lir tembangtsü. Tsüngremi tila tanurtem tim lenmang nung anitetdaktsünür aser ibaji tsürabur indang tebilemtsü khuret lir. Apijemtsü Shin 22:6 nung “Tanur ka pa aotsüba lenmang nungji sayutetang; Aser pa tain akümdang iba nung jagi mepilatsü” ta shia alibaji tsüraburtem nem nungloktsüba mapa ka lir. Ajisüaka, tsüraburtemi pei tanurtem dang Khristan ka ama libalirotsü tesayuba mesayudang tamasa asenoki asen taküm nung Khrista anioktsüla aser tanurtemi aseni inyakba, jembiba ajak nung Khrista angutsüsa alitsü asoshi merangtsüla. Laishiba nung Tsüngremji temeshi lir aser asenoka temeshi alitsü atema ayongzüker saka asenoki yamaji mekümtettsü. Asenoki Yisu Khrista ama melitettsü mesüra Pa ama tashishitsü maketba aser tetemjen nisung amabo mekümtettsü, saka asenoki Khristan tamanger tajung ka amabo litettsü akok. Kodang tsüraburtemi Khristan tajung ka ka ama lia sayudir, tanurtemia iba jiluji melamela ajizüktsü aser asenoki parnok nem tesayuba agütsübaji parnoki menungnangi dang mulungsoa agizüka benshitsü. Asenoki mezüng Tsüngrem den tesentaktep ayutsüla, tanabuba nung kibong atema tongti süa bilemtsüla aser tasembuba nungang mapaji südaktsütsüla. Kodang asenoki asen kibongji kanga tongtipang ta angatetdir, asenoki chirnur nem mapang peria agütsütsü aser iba jagi parnok den tesentaktep akangakanga ayutsü. Asenoki tanurtem nem Laishiba angazükdaktsütsüla aser Tsüngrem o sayutsüla. Hao, arogoi tila tanurtem atema Deobar school lapokja lir aser iba nung parnok dang Tsüngrem o sayur saka Tsüngrem o angazüktsü atema terajibo kibong nungi tenzüktsüla. Tsürabur aser tanurtemi arogo den tesentaktep ayutsüla kechiyong Khristantem tsüngda tesentaktep alitsübaji kanga tongtipang. Asenoki asen chirnurtem dang Tsüngrem külemtsü sayutsüla aser ibaji sentepsenji nung adenba ajanga mapa küma sayur. Tamangertem ajak atema sarasadem ya kanga tongtipang aser nür kibongi sarasademba nung mapang endoktsüla. Anogoshia sarasadem mapang aliba ajanga tanurtemi tim lenmang nung anitettsü aser parnoki Tsüngrem dak tali amangtsü tangatetba angutsü. Asenoki asen tanurtem den külemi sarasadem mesüra aser parnok atema mesarasademtsüra, parnok tamang ainba nung tetsükdaktsü ajurutsü. Tanü Aoli Arogo ajak nung ABAM-i Tanurtem Amungnü ayonga amungdang asenoki asen chirnurtem Tsüngremi aginüba ama anitettsü atema tenangzükba agishidi ta ayongzüker.