Tanzania-i Kenya nung yariteptsü asoshi doctor 500 yoktsü

DAR ES SALAAM (Tanzania), March 18 (Agencies) : Kenya Mozükitem nung doctor temi longkak aitba ajanga tebilemtsü tulu akümba süngjemdaktsütsü asoshi Tanzania nungi doctor 500 tashi yoktsü lemtetogo, ta Honibarnü Tanzania Tir office sangdong ka ajanga metetdaktsü.
Ita sen aser parnok mapa nung tetsükdak aluba agi Kenya nung aliba doctor temi December 05, 2016 nü nungi longkak aita liasü. Item tebilemtsütem bentettsü asoshi tezüngzüktep kabo agiogo, ajisüaka tang tashi doctor tem aika mapai marur.
Iba longkak ajanga sen aser shirangertem anepaluba oset agi mezüng yongi kanga anünga aliba mozükitem aika nung joko shiranger aser manemertem magizüker. Iba tensa yagi Kenya Tir Uhuru Kenyatta menden tanaben buba anokshitsür.
Kenya-i doctor kar yoksemang ta mepeshiba ama mapa küma inyaktsü, ta Honibarnü Dar es Salaam nung Kenya health minister, Cleopas Mailu den ajurutepba mapang Tanzania Tir John Magufuli-i metetdaktsü.
“Kenya-i mepeshiba ama linük mozükitem nung tang doctor mepiri aliba perisemtsütsü asoshi Tanzania nungi doctor 500 yoksemtsü melaogo,” ta Magufuli indang office sangdong ka ajanga metetdaktsü.
“Kenya tebilemtsüji Tanzania tebilemtsü lir,” ta Magufuli-i ashi.
Tanzania nungi aruba doctor tem nem Kenya-i ita sen agütsütsü aser talidak ki-a agütsütsü, ta sangdong nungji shia lir.
Tanzania Health Minister Ummy Mwalimu-i, Tanzania nung doctor renema zünger mapa mangurtem aika liasü, ta ashi.
Kenya Health Ministry aser Kenya doctor tem telongjemi iba inyakyim tasen atema ano kecha telangzüba magütsüi lir.
Hokolbarnü Kenyatta National Hospital rangben nung doctor ana dang mapa nung liasü. Iba mozüki ya linük nung aliba mozüki ajak rongnung tulutiba lir, ta nurse kati osangbenertem dang ashi.
“Onoki nü nem ango-ayang anentsü mozü ang kar agütsütettsü, saka na doctor denbo mapang talang ka majuruteptettsü,” ta lai gari lendong nung tetsüng külen kanga aroka ia ranger azü yima aruba tetsür ka dang ashi.