Tanzania-India tsüngda tezüngzüktep 5 agiogo

Dar Es Salaam, July 10 (Agencies): Tanü Tanzania yimtiba, Dar Es Salaam nung India Ato kilonser, Narendra Modi-i Tanzania Tir, John Pombe Joseph Magufuli den senden amendang Africa continent nung talisa, rongsenkettsüng nung tesentaktep tajungba akümtsü atema jembi, aser linük ana tsüngda Tanzania yimti 17 nung tzü supply atema US sen million 92 tenangzüktep densema tezüngzüktep pongu agiogo.
Yasüng tesü Ato kilonser, Modi South Africa nungi Tanzania linük tonga aruba sülen tanep pai Tir, Magufuli den sobaliba asem tema liasü.
Zanzibar water supply tajungba akümtsü atema India-i US sen million 92 aputsütsü atema tenangzükba ka agi, iba den külemi diplomatic/official passport alirtem atema visa waiver tenangzükba agi.
Tanzania ya tongtibang partner ka lir ta shia Modi-i, “Tayongzükba ana- kiralongraba aser alima tzü-mopung melenshiba atema linük anapronglai tesem aser alima den amalitepa inyaktsü bangjemogo,” ta metetdaktsü.
Magufuli den külemi osangbenertem senden nung jembidang Modi-i, “Indian Ocean ajanga kidanger ama, Tir (Tanzania Tir John Magufuli) künati defence aser security partnership akangshitsü bangjemogo,” ta metetdaktsü.
Tanzania-i aluyimba, shisaliok aser anema alibaren densema lenla ajaklen terenlok lenmang nung jajadang India ji melunglemtetba tembar tajung ka asütsü, ta Modi-i ashi.
“Tembar ka ama onoki ajangshibatem, onoki mongin süa aliba, onoki koktetbatem aser ozü technology ji Tanzania den lemsateptsü mulunga lir, aser ibaji nenok nüngdak aser tongtibang onüktem apir inyaktsü,” ta paisa ashi.
Tanü nikongdang Modi-i Tanzania nung India sensotem den jemiba liasü.
Modi-i Africa linük pezü semdangtsü atema apusoba sülen pai linük asem (Mozambique, South Africa aser & Tanzania) semdangogo aser tesüsa pai Kenya semdangtsü.