Taoba APSC mendenbuba-i bail meshiba magizük

Guwahati, January 13 (Agencies): Sorkar mapa agütsütsü asoshi sen meshiba ken-o nung pua alisang, taoba Assam Public Service Commission (APSC) nung mendenbuba, Rakesh Paul tepuokdak yua aliba nungi bail nung chioktsü asoshi mepishiba shidi zülu, saka Guwahati high court-i magizük.
Taoba küm December ita special judges court ka nung pai bail meshiba magizük aser iba sülen pai high court dangi bena liasü. Paul ya taoba küm November 18 nungi tepuokdak yua lir.
Assam Police-i case diary agütsüba nung Paul-i APSC nung sen yong mapa ayokba ken o nung sentaktepa lir ta kuli anguba sülen court-i iba tetuyuba agüja liasü.
“Iba maparen nung Paul densema aliba kuli aika iba case diary ajanga sayur, anungji pa nem bail agütsütsü metemsü ta court-i reprangteter,” ta court-i shia liasü.
Maneni Forensic osang-a atadar.
Iba maparen nung nisung trok apu, kuli agütsür 46 tendangogo aser sen lakh 40 den tejangja kuli aika police-i nguteta lir. Iba maparen nung tongti shilem agir nisung asem bushidar, ta Assam DGP, Mukesh Sahay-i metetdaktsü.
Dibrugarh nung town & country planning department nung assistant engineer, Nabakanta Patir-i APSC nung mapa agütsütsü asoshi sen meshiba mapang apu aser iba nisung den Paul jungjunga sendaktepa aliba kulitem, iba ken o bushisüngdangba mapang ngutet. APSC tatidang tabulation sheet aser invigilator sign keta aliba answer script tem Paul’er kidang police temi nguteta lir.
“2016 küm block development officer (BDO) post ka atema sen lakh 40 meshitsü asoshi Paul aser Patir na telephone ajanga jembi,” ta police ajanga sangdonga liasü. Paul kisüng masü, saka tanüngba nisungtem iba ken o nung pua alirtemi bail meshiba magizük. Parnokji Patir, APSC züngsem Samedur Rahman, Basanta Doley aser APSC assistant controller of exam, Pabitra Kaibatra nunger lir. Paul den yariteper Sudip Das-ia bail meshi saka magizük.
Special public prosecuter, Bijon Mahajan-i item temepishibatem anema nokdaka liasü.