Taoba Arunachal Chief Minister Kalikho Pul soseta sür lia angu

Guwahati/New Delhi, August 9 (Agencies) : Supreme Court-i  Kalikho Pul Arunachal Pradesh Chief Minister menden nungi anendaktsüba sülen hopta ishika lir tanep Pul pa indang takdang nung alenseter lia angu.
Arishi küm 47 Pul ji pa chief minister indang official residence nung liyonga aruya liasü aser pa temang aliba takdang nung diary ka yuja aliba police-i tendanga reprangdar.
Iba tatalokba atema Chief Minister Pema Khandu-i bushisüngdang ka asütsü tetuyuba agütsüogo.
Pul asüba osang angashiba sülen pa pusemer aika Itanagar nung par kima adenshi aser idangji pa mang enoktsü süngden ka bener aru saka sentepa alirtemi asür Pul mang iba süngden dang nungi tajungba ka nungang enoktsü ta tejashi nung süngden nung mi senoka rongdoktsü.
Pul pusemertemi tejashi nung Deputy Chief Minister Chowna Mein aser Industries Minister Tapang Taloh’er ki amak aser Itanagar jila nung garitem kar nung mi senoktsü.
Lungkak aiter kari CM Khandu’er kidanga lung agi aon aser kari Deputy CM Chowna Mein’er kidangi mi senoktsütsü merang.
Tanep Itanagar nung aliba Chief Minister bungalow nung taktang ka nung Pul alenseta sür lia angu aser mezüng bushisüngdangba ajanga pa tanep 8-9 ako meta alenset asütsü akok ta osang metetdaktsüogo.
Pa den tesentaktep tajung alir kari ashiba agi, pa telok nungi balaka züngdoka amshiba atema kanga jashia liasü.
Taküm küm tetenzüklen Pul-i anir Congress nung temulung masüba telok kati Nabam Tuki anema apuso aser February 19 nü pa chief minister inyaktsü shim. Ajisüaka ita pezü shi pa chief minister inyaka aruba sülen Supreme Court-i sorkar loksatsü tetuyuba agütsü.
Asür Pul ya Hawai, Anjaw district kübok Walla yimtsüng nung July 20, 1969 nü aso. Pa ita 13 asüdang tetsü Koranlu asü aser küm pungu dang lir külen tebu Tailum-a asü.
Pa tetsü tanutsü’er kibong den ali aser pa arishi küm 10 asüdang Hawai Craft Centre nung carpentry course agitsü tenzük. Idakji pa tesayur ka ama inyak aser night school nung azüngtsü tenzük.
Pa azüngba school nung sentong ka agidang Pul-i tesentepertem pela agizük aser Hindi oshi nung linük meimba ken ka aten. Iba sentong nung education minister Khapriso Krong aser Lohit Deputy Commissioner D S Negi na liasü aser Negi-i Pul sakloka school ketdangsertem dang pa day boarding school ka züngdaktsütsü ajungmeso.
Pa school azüngdang Circle Office, Hawai nung watchman mapa inyak aser iba sülen paan dokan amen, aou agi atsü atsüba aser kisüjensüba mapatem inyaka pa tepok mesü. Pa Economics nung graduate asü aser law azüng.
1995, 1999, 2004, 2009 aser 2014 election tem nung asür Pul-i Hayuliang Vidhan Sabha constituency nungi Indian National Congress candidate ka ama toktepa takok nguyonga aru aser 2003 nungi 2007 tashi taoba Chief Minister, Gegong Apang’er ministry nung State Finance Minister inyak.
Ano külen, Pul asüba sülen ozüng alema mapa inyakba atema Centre-i tanü Arunachal Pradesh-i Central paramilitary forces company 5 tashi yokogo.
Arunachal Pradesh nung state sorkar den yariteptsü atema paramilitary force company 5 yokogo, ta sorkar osang ka ajanga metetdaktsü.
Nagaland Chief Minister, T.R. Zeliang aser NPCC Tir, K. Therie natia sangdong balala ajanga taoba Arunachal Pradesh Chief Minister, Kalikho Pul asüba osang angashia aoksaba aser asüku lemsatepba metetdaktsüogo.