Taoba Ato kilonsertem indang museum yanglutsü: PM Modi

New Delhi, July 24 (Agencies): Taoba mapang Ato kilonsertem kar nem tim tetushi magütsüba atema sasar, ta shia Bodhbarnü Ato kilonser, Narendra Modi-i, par sorkari taoba mapang Ato kilonsertem ajak atema museum ka yanglutsütsü, ta metetdaktsü.
Taoba mapang Ato kilonser, Chandra Shekar indang kaket ka sayaba sentong nung jembidang Modi-i, linük jenjang nung lenirtem kar nem tim tetushi magütsü, aser ibaji telok ka ajanga lir, ta ashi. “Nisung kari Dr Ambedkar aser Sardar Patel nunger ama kanga nüngtugu nisungtem tenüng tajung nokdang. Kasa telok jagi Morarji tenüng tajung menüktsü,” ta Modi-i ashi.
“Metetsümonga parnok tenüngji nüburtem melungjang nungi aidoktsüogo. Ibaji yimtenren telok kati inyak, ta ni sasaseta ashir. Ajisüaka nenok temoatsü ajanga ni linük nung taoba mapang Ato kilonsertem ajak atema kanga akhümket museum ka yanglutsütsü telemtetba agiogo,” ta pai ashi.
Modi-isa Charan Singh, HD Deve Gowda, I K Gujral aser Dr Manmohan Singh nunger ama taoba mapang Ato kilonser inyaker kibongtem dang parnok taküm otsü lemsateptsü asüngdang.
Chandra Shekhar bilemteta Modi-i, Congress nübo ka süaka pa ya sobaliba benshiba aser tangatetba tajung aliba nisung ka liasü, ta ashi. “1977 küm mezüng ni Chandra Shekhar ajuru. Ni pa Delhi airport nung ajuruba bilemteter. Ni Bhairon Singh Shekhawat den külemi ainlen senzüdang party balala nungi yimtenren tangatetba balala süaka lenir ana tsüngda tesendaktep tajung liasü,” ta Modi-i ashi.