Taoba Bihar & Tripura Angh Konwar AIUDF nung aden

Guwahati, January 20 (Agencies) : Bodbarnü taoba Bihar aser Tripura Angh Devananda Konwar-i AIUDF nung denogo aser iba ajanga Assam nung sorkar tashi abener Congress atema tetsükdaktsü tulu angutsü amai ajiteter.
All India United Democratic Front (AIUDF) ya perfume businessman Badaruddin Ajmal-i tenzükba telok lir.
Barpeta district kübok Chenga nung lokti senden ka nung Konwar-i AIUDF nung züngsem aküm.
Iba mapang Ajmal-i Konwar pelashishia agizük aser pa party nung adenba ajanga tajangzük tulu angutsü ta Ajmal-isa metetdaktsü.
1955 nung Konwar kaketshir lennir ka inyakba mapang Congress nung züngsem aküm aser Assam Pradesh Congress Committee (APCC) nung menden balala nung mapa inyakogo.
Pai AIUDF nung adenba atema kuli kecha magütsü saka Assam Chief Minister Tarun Gogoi den tebilemba nung meputep adokba ajanga pai AIUDF nung aden asütsü akok ta bilemer.
Konwar-i 1991 küm taoba chief minister Hiteswar Saikia lenisüba kübok cabinet minister inyak aser ano 2001 nunga Tarun Gogoi’er cabinet nung züngsem liasü.
Ajisüaka, Gogoi den obang meputep kar adokba sülen pa council of ministers nungi anentsü.
Konwar yagi Sivasagar district kübok Thaora constituency nungi toktep saka 2006 assembly election nung pai tamakok angu.
2009 küm pa Bihar nung Angh inyaktsü shim aser iba mapa nung pa 2013 tashi inyak. Iba mapang paisa West Bengal nung December 2009 nungi January 2010 tashi Angh mapa repsema aben.
March 2013 nung Konwar Tripura Angh inyaktsü shim saka June 28, 2014 nü pa iba menden nungi anentsü.
2012 küm Konwar Bihar nung Angh inyakdang accountant general-i pa anema ken o ka benok. January 2009 nungi March 2012 tsüngda Angh-i sen endokba nung ajemdaker Bihar accountant general-i iba ken o benoka liasü.