Taoba Bihar, WB Angh, Kidawai alima nungi pilaogo

Ranchi, August 25 (Agencies): Taoba mapang Bihar aser West Bengal Angh, A R Kidwai mapang tatsüka shirangba sülen Ranchi nung aliba hospital ka nung süogo. Pa arishi küm 96 liasü.
Yashi Kidwai-i jabaso ana aser jala pezü toktsür alima nungi pila, aser tanü nikongdang  Jamia Burial Grounds nung asüpila sentong agiogo.
Pa asüba asüko lemsatepa Ato kilonser, Narendra Modi-i twitter ajanga, “Dr AR Kidwai alima nungi pilaba atema ni asüko osang lemsateper. Pai lokti nung mapang talangka shilem aser khuret jenti agiogo,” ta ashi.
Modi-isa, “Dr AR Kidwai-i shisaliok aser lokti tenzükba nung ajateta inyakogo. Pa tanela tesünep nung anisüngzükang ta sarasademtsür,” ta ashi.
Ano Congress tatong Tir, Rahul Gandhi-ia twitter ajanga, “Taoba mapang Bihar, Bengal aser Haryana Angh, Dr AR Kidwai alima nungi pilaba atema jashir. Shisashir ka aser meimchir temeten atema inyaker ka samaba atema kanga mangyimer,” ta ashi.
Akhlaq Ur Rahman Kidwai ya 1920 küm aso aser küm 17 tashi Bihar (anaben), West Bengal aser Haryana Angh inyak aser khenpiga atema Punjab aser Rajasthan Angh repsema inyaka liasü, iba den külemi Delhi aser Chandigarh nunga administrator inyakogo.
Pa 2000 küm nungi 2004 küm tashi Rajya Sabha züngsem liasü aser 1974 nungi 1978 küm tashi Union Public Service Commission (UPSC) Mendenbuba inyaka liasü.
January 25, 2011 nü Kidwai-i Padma Vibhushan award ngua liasü.