Taoba Boxing World Champion Rocchigiani süogo

Mongputeni/October 3, 2018 (Agencies): Germany nunger taoba world super-middleweight aser light-heavyweight champion Graciano Rocchigiani, southern Italy nung gari kati tsüksetogo. Pa arishi küm 54 liasü, ta Sangtennü ketdangser sangdong ka ajanga metetdaktsü.
Graciano tebu ya Italy nunger aser tetsü German tsür lir, pai 1988 nungi 1989 tashi IBF super-middleweight title anaprongla bena liasü asre iba den 1998 küm Michael Nunn koka WBC light-heavyweight champion aküm.
Rocchigiani shiba pa indang professional fight 48 prongla Germany nung asaya, pa 1990s nung külem Germany nunger asayar Henry Maske aser Poland nunger Dariusz Michalczewski den asayaba asaya ajanga boxing world atsüa aru.
Pa tatemsa 2003 küm asayaa liasü, kong pa WBC international light heavyweight title atema asaya nung tamakok ngua liasü.
“Athletes rongnung tajungtiba ka asüba Berlin-i mang ayimer, shibai 1980s aser 1990s nung nüburtem pangkadakja liasü,” ta Berlin mayor Michael Mueller-i sangdong ka ajanga ashi.
“Alima ajung nung pa ya Rocky ta jaa liasü aser pa Germany nunger rongnungi iba professional sport nung world champion tasembuba liasü,” ta kasa sangdong nung shia lir.
Rocchigiani shiba licence tejangja melei gari anishiba aser tanga dak azükba atema tepuokdak yua liasü, pa ya Germany nunger rongnungi world boxing champion tanubosang liasü. Pa masü tsüngda boxing commentator amaa inyakogo.