Taoba CM, Kalikho Pul kinungtsüi CBI teyari meshir

Itanagar, February 11 (Agencies): Taoba Arunachal Pradesh chief minister asür, Kalikho Pul-i pa soseta masü tsüngda tapak 60 nung shidi zülua toktsüba osang balala ajanga nübortem nem metetdaktsüba sülen, Honibarnü asür kinungtsü, Dongwimsai Pul-i Centre dang CBI ajanga tebuba asüba ken o bushisüngdangtsü asoshi akhang.
February 8 nü osangkaket ‘The Wire’ ajanga asür Kalikho-i züluba shidi kaket ‘Mera Vichaar’ nung aliba onüktem parnok osangkaket nung adoktsü. Iba kaket nung Pul-i Chief Minister Pema Khandu, Deputy Chief Minister Chowna Mein aser Tourism Parliamentary Secretary Passang Dorjee Sona nunger temi ochimashi inyakba ken o tem jungkai adoka züluja lir.
Iba osang ya social media balala nung taoba anogo ana tsüngda ayimsünga prokshiogo.
State yimtiba, Itanagar nung osangbenertem den jembidang Dongwimsai-i Ato kilonser Narendra Modi aser Union Minister of State for Home Affairs, Kiren Rijiju na dang tebuba asüba ken o CBI ajanga bushisüngdangtsü asoshi achaayangtsü atema akhang.
Bushisüngdangba maparen tenokdangba kecha makai sademsadema agitsü asoshi Khandu, Mein aser Sona nunger parnok menden nungi alutsü asoshi laisa akhang.
“Soseta asüba shidi, koba ‘social media’ balala ajanga ayimsünga prokshi, iba ya kanga dang ochi lir aser ajaki amangtsüla. Iba ya kübubai toktsüba shidi shidakbaji lir,” ta lai ashi.
Pul yaküm August 9 nü soseta asü. Pa mang chief minister kidang tsüngbang nungi sangzüa lia angu.
Yaküm February 19 nü Pul chief minister mendeni mapang tatsüka atema atu. Supreme Court-i July nung Nabam Tuki maneni Chief minister menden nung shimshia liasü.