Taoba Delhi Lt Gov-i jembibaji shitak jembiogo: Rijiju

New Delhi, October 21 (Agencies): Mangatetep adoktsüsa tanü Union Minister of State for Home, Kiren Rijiju-i, taoba mapang Delhi Lt Governor-i North Delhi nungeri temzüng raksaba nung jangratem angur ta jembibaji shitak jembiogo, ta ashi.
Osangbenertem den jembidang Rijiju-i, “Küm ishika tejaklen Delhi Lt Gov. kati jembiba o kuliser rongnung ni liasü. Pai, North India nungeri temzüng raksaba nung jangratem angur ta jembi aser nikongdangbo pa nem tatok meshidaktsü,” ta ashi.
“Ajisüaka pai jembibaji shitak jembiogo ta ni amanger,” ta paisa ashi.
Arunachal Pradesh senso Rijiju-i Lt Governor ba tenüngjibo metetshi, saka iba oji 2008 küm February 8 nü taoba mapang Delhi Lt Gov. Tejinder Khanna-i jembiba o lir.
“North aser West India-i temzüng alema inyakba aser parnok anema temerenshi kecha magütsübaji asayamenü aser nüma atangtsü ka ama agir,” ta Khanna-i jembia liasü, ajisüaka Congress aser BJP-i iba o anema noktakba ajanga tesülen pai iba oji meyipa agi.
Rijiju-i, “Yangi aliba nüburtemi parnoki police ketdangser ka amokmeren ta bangsoa jembitsü jangrar. Iba tetezü, lokti ajak melenshitsü nüngdaka lir,” ta ashi.
Paisa, tai ajakji police nem tongloktsübaji tim masü, ta ashi.
“Nisung aikati police kanga sashia kümogo ta jembir. Nüburtemi tim-i dang lira police mesashitsü. Ajisüaka shin o ka lir, nai süng amshia mazük tashi nüburtemi tashi mangatsü,” ta Rijijui ashi.
Delhi Chief Minister Arvind Kejriwal-i, ochimeshitiba ji Delhi Police lir ta jembiba mapang ka nung Rijiju-i, Police metenja, tesem mashi ka nung temzüng alema tatalokbatemji police nem tai tongloktsütsüji kanga melamelar, ajisüaka temzüng ozüng benoktsü atema aonung piyong memejangertemji khaki uniform nung alirtem lir, ta ashi.