Taoba FBI deputy director Andrew McCabe anentsür

Washington, Metsüremi 17 (Agencies) : Taoba FBI deputy director, Andrew McCabe shiba anogo ana dang lirbo pension dena mapa nungi anisüngzük angutsüba liasü, pa mapa nungi anentsüogo.
Pai miim o kar lemsatep aser bushisüngdangertem mashi lenmangi odaktsü, ta shia US Attorney General, Jeff Sessions-i pa mapa nungi anentsü.
Aji oda süaka, McCabe-i ashiba agibo 2016 küm Tir election mapang Russia nungeri teka amuoka inyaktsü merangba indang kuli bushisüngdangba maparen nung pai shilem agiba ajanga pa anema inyaker.
Democrats pur tsütsü tejak shir inyakba atema mapang talangka tejaklen nungi Trump-i McCabe aija liasü.
Pa mapa nungi anentsütsü telemtetba agiba osang angashili Trump-i Sessions nem tenüngsang agütsüogo.
“Benefits ajak dener mapa nungi anisüngzük angutsü asoshi FBI Deputy Director Andrew McCabe atema mapang asemjena odar. Anogo 90 dang anünga lir!!!” ta taoba December ita nung Trump-i Twitter ajanga sangdongba sülen FBI nung tanishir tanabuba tiaji tsüremseta akümer mesüka liasü.
Hillary Clinton secretary of state inyakba mapang lai jurila ’email server’ amshi ta putetba aser Tir election nung Russia nungeri Trump nem takok ngudaktsütsü meranger ta temulung malem bilemba onük ana, koba 2016 küm Tir election atema nüboyimba mapang atalok, iba indang FBI-i bushisüngdangba nung McCabe inyakyimji mita liasü.
Taoba January ita nung McCabe-i FBI deputy director mendenjibo toktsüogo saka pa retirement matong tashibo FBI nung densema liasü.
Osang ajanga ashiba agi, justice department nung tekolakba Mr Sessions-i Hokolbar aonung (par mapang) pa mapa nungi anentsü.