Taoba Finance Minister Arun Jaitley temang kanga mejungi lir

New Delhi, August 16 (Agencies): Taoba mapang Union Finance Minister aser BJP lenir tain, Arun Jaitley temang kanga mejungi lir aser Hokolbar nikongdang Delhi nung aliba All India Institute of Medical Sciences (AIIMS) nung life support agütsüdar, ta osang ka ajanga metetdaktsü.
Linük Tir, Ram Nath Kovind, Union Health Minister, Harsh Vardhan aser Minister of state for Health, Ashwini Kumar Choubey nungera tanü AIIMS-i oa pa semdanga liasü.
August 9, 2019 anepdang Jaitley, AIIMS-i anir aoba sülen aonung ventilator nung ayu. Iba mapang nungjagi tenzüka pa intensive care unit (ICU) nung treatment agidar.
Osang ka ajanga ashiba agi, kasa anogo nungi tenzüka multidisciplinary doctors team kati pa temang anepalua reprangdar.
“Tang pa temang jenjang kasa dang lir. August 9 sülen nungibo AIIMS hospital-i Jaitley health indang medical osang kecha magütsür,” ta kasa osang ajanga ashi.
Arishi küm 66 yimtenren lenir, Arun Jaitley-i taoba mapang Ato kilonser, Atal Bihari Vajpayee sorkar nunga tongtibang portfolio aika aben aser Narendra Modi-i aniba sorkar nunga Minister liasü, ajisüaka joko mapang tatsüka pa temang kanga manemi arudar.
Pa temang mejungi dang aliba nung ajemdaker pai taküm Lok Sabha election nunga metoktep.
Taküm February ita nung Jaitley temang treatment atema US-i oa aliba ajanga pa melen Piyush Goyal-i Parliament nung interim budget benoka liasü.
Taküm Lok Sabha election nung BJP-i aniba NDA-i takok anguba sülen Jaitley-i shidi ka ajanga Ato kilonser Modi dang pa temang kanga majung anungji pai menden/portfolio kecha magizüktsü, ta shia liasü.