Taoba ghonda 24 tsüngda India nung nisung 386 dak COVID-19 putet

New Delhi, April 1 (Agencies): Taoba ghonda 24 tsüngda nisung 386 dak COVID-19 aketba putetogo aser iba ya ajanga India nung COVID-19 aketer ajak agi nisung 1,637 jungogo. Parnok rongnung tasür 38 dena lir, ta Bodbarnü Health Ministry-i metetdaktsü.
“Nisung aika dak COVID-19 putetba ya Delhi Nizamuddin Markaz nung Tablighi Jamaat mungdang nung adenertem dak teimba putetba lir” ta Health Ministry nung Joint Secretary Lav Agarwal-i ashi.
Bodbarnü Markaz nung adenertem dak novel coronavirus aliba putetbaji Andhra Pradesh nungi nisung 43, Assam nungi pezü aser Puducherry nungi ana lir. Maneni, Delhi, Maharashtra, Punjab, Gujarat nunga tasen putetba aser Mumbai, Madhya Pradesh o Bengal nung nisungtem asüba osangtem lir.
Delhi kübok Nizamuddin ya Covid-19 hotspot ta ajar aser tanü Pune nung Tabligh-e-Jamaat mungdang nung adener 30 tashi quarantine süogo. Karnataka nung iba mungdang nung adener nisung 12 tashi quarantine asüba osang metetdaktsüogo.
March ita tomlen Delhi kübok Markaz Nizamuddin nung nisung 4,000 shi mungdang nung aden aser state balala nung item nisungtem maitsü jangjatsü, tendangtsü aser quarantine asütsü atema mapa inyaker.
Union Home Ministry-i state sorkartem dang Tablighi Jamaat bendangertem ajak jangjatsü aser quarantine asütsü atema tetuyuba agütsüogo.
Item nisungtemi medical clearance anguba sülen linük adena yoktsü atema Home Ministry-isa metetdaktsüogo.
Tablighi Jamaat mungdang nung adenertem dak COVID-19 kanga putetaka Indian Council of Medical Research (ICMR)-ibo United States den medemdangra India nung iba virus menatepa ya kanga agi tajemba lir ta metetdaktsüogo.
Taoba hopta ka tsüngda India nung COVID-19 aketer nisung teimba putetogo saka tanga linük dang nungi India nung tajemba menateper, ta health ketdangsertemi ashi.
Alima nung novel coronavirus ajanga nisung 42,000 tashi süogo aser lakh 9 shi ka dak aketba puteta anepalur.
Bodbarnü United States nung coronavirus wara ajanga nisung 4,000 tashi süogo, ta Johns Hopkins University-i osang metetdaktsü.
US Tir Donald Trump-ia America nunger dang ‘hopta tamajung ana ajurutsü” ta osang metetdaktsüogo.
US nung nisungtem tepila ayutsü tuyuba ama inyak nunga nisung 100,000 nungi 240,000 tashi taküm samatsü akok, ta White House-i asadangtetba osang ka metetdaktsüogo.
UN Secretary-General Antonio Guterres-ia World War II sülen alima nung tensa tamajungtiba ajurubaji COVID-19 wara ya asütsü, ta metetdaktsüogo.