Taoba ghonda 24 tsüngda nung IS tesep 9 tashi makdokogo: Russia

Moscow, October 05 (Agencies): Syria nung yutsüba Russia mitkartemi par tayimtsü amshia Syria nung tentetba Islamic State (IS) kiralongrar telok indang tesep 9 tashi taoba ghonda 24 tsüngda nung makdokba osang ka Russia Defence Minister, Sergey Shoygu-i tanü Hombar nü metetdaktsüogo.

Par mitkar tayimtsütemi Syria kübok Homs, Idlib aser Latakia province nunger nung IS teloki tentetba command centre-tem, tongpang nung amshitsü osettsüset ayudak ishika aser communication post-tem tanü makdokba osang jangjaogo ta pai ashi.

“Syria kübok Hmeimim nung ozü mitkartemi tenetba tayimtsü tesep nung alir mitkartemi ketdang asüba Su-34, Su-24 aser Su-25 jetfighter tayimtsütem amshia IS tesep 9 tashi taoba ghonda 24 tsüngda nung makdokogo,” ta Shoygu-i nenshia ashi.

Par mitkar tayimtsütemi Syria northwest tsütsü Idlib province kübok Jisr al-Shughur yimti anasa IS teloki tentetba artillery tesep aser parnoki amshiba armoured garitema poksatsü ta pai shisem.

Tzüyimkümlen tentetba Latakia region nunga IS command post ka poksatsüba den külemi, Homs province nung Rastan jila anasa tentetba tongpang nung amshitsü osettsüset ayudak 2 aser communication centre 1 par mitkar tayimtsütemi poksatsüba osanga jangjaogo ta paisa ashi.

“Syria nung tentetba IS telok anema raratsü tenzüker,” ta shia, Syria nung tawa tesep tentetba Russia mitkartemi taoba Bodbar nü nungi tenzüka par tayimtsü amshia amaktsü maparen inyakba osang bushiteta lir.

Ajisüaka, Syria Tir, Bashar al-Assad-i aniba Syria sorkar jenjang tajungba kümdaktsütsü nükjidong nung Russia mitkartemi IS telok amaktsü dak ajemdaker Syria sorkar anemertem anema rarar ta shia, US densema West linüktemi Russia aija lir.