Taoba IAF tongti, SP Tyagi anogo 14 judicial ket nung agütsüogo

New Delhi, December 17 (Agencies): AgustaWestland VVIP helicopter ochimashi ken o nung Honibarnü Patiala House court kati taoba mapang Indian Air Force (IAF) tongti, SP Tyagi den tangar nisung ana anogo 14 judicial ket nung agütsüogo.
Arishi küm 71 Tyagi ya 2007 küm mapa nungi anisüngzüka liasü, aser par kinunger Sanjeev aser advocate Gautam Khaitan nunger tanü court matsüngdangi anir oa liasü.
Helicopter ochimashi ken o dak sentakba nung December 9 nü CBI-i parnok apu.
December 10 nü court-i par asem anogo pezünü atema CBI nem agütsü aser ibaji December 14 nü tembanga liasü.
Chopper alitsü atema jembidang süpokrem ken o nung December 14 nüsa Special CBI Judge, Arvind Kumar-i par asemprong December 17 tashi ayutsü anogo atsülanga liasü.
“Tyagi-i pa official menden (Air Chief Marshal) tim masüba nung amshiogo aser ali den kiojen nung sen jenti indokogo, aser pai sen aruba lenmangtemji sangdonga mali,” ta CBI-i pa nem tai tonglokja lir.
CBI-isa, süpokrem sen agi India atongba sentongji Khaitan-i yanglua liasü aser Sanjeev-i Europe nungi Carlo Gerosa den inyaka liasü, ta aitsür.