Taoba ita 3 tsüngda aluyimer 116 soseta süogo

New Delhi, April 26 (Agencies): Aluyimba nung takoksa anguba kuli balala ajanga taküm küm tang tashi nung aluyimer 116 tashi soseta süogo; aser aluyimer timtiba soseta asüba state ji Maharashtra lir, iba sülen Punjab aser Telangana state na lir, ta tanü Parliament nung sorkari metetdaktsü.

2015 küm aluyimer 2,000 dak tema asü, aser aluyimer timtiba soseta asübaji Maharashtra kija nungi parnoki 1,841 liasü, ta tanü Lok Sabha nung Minister of State for Agriculture, Mohanbhai Kundariya-i metetdaktsü.

Taküm Maharashtra nung aluyimer 57 soseta asü, Punjab nung alu nung aayanger 56 soseta asü aser Telangana nunga aluyimer 3 soseta asü, ta Kundariya-i metetdaktsü.

Aluyimertem soseta asüba nokdangtsü atema sorkari kechisa inyak, ta asüngdangba langzüdang minister-i, sorkari tzünglu maruba ajanga kongshiba state 10 nem senotsü teyari crore 12,773.34 lemzüktsüogo, ta ashi.

Tang Karnataka, Chhattisgarh, Madhya Pradesh, Maharashtra, Odisha, Telangana, Uttar Pradesh, Andhra Pradesh, Jharkhand aser Rajasthan state tem nung tzünglu junga maruba ajanga aluyimertem timtemdar.

Senotsü teyari dak alia Centre sorkari diesel/seed subsidy agütsüba den külemi MGNREGA scheme kübok anogo 50 aayangtsü aser alima lendong balala agi kongshiba tesemtem nung kibong shia nem anogo 100 dak tema aayangtsü maongka agütsür, ta minister-i shisem.

Minister-isa angati farm loan atema sen crore 50,000 aliba nungi sen crore 1,00,000 kümtsüogo, ta metetdaktsü.