Taoba kilonser Toshi Sangtam süogo

Dimapur, Sept.12(TYO) : Nagaland nung taoba kilonser (ex-minister) L.J.Toshi Sangtam yashi Hokolbar nü par kidang Tuensang nung lia alima nungi pilaogo. Pa arishi küm 81 liasü.
Asür Toshi Sangtam ya 1934 küm aso aser 1974 küm Longkhim-Chare assembly constituency nungi Independent candidate ka ama adok saka election sülen pa UDF telok nung aden aser pa nem Transport & Communication aser Geology & Mining kilonser mapa agütsü.
Pa asüba osang angashia Nagaland Legislative Assembly nung Speaker Chotisuh Sazo aser Chief minister T.R.Zeliang natia asür kinüngertem den mangyim jashi lemsatepba osang ka metetdaktsüogo.
Asür Toshi Sangtam ya akhidang Tuensang district melemsai alidang kanga nüngtugu samanir ka liasü. Pa asüba ya Naga nunger ajak asoshi aser ano talisa Tuensang district atema kanga takoksa lir ta Chief minister, T.R.Zeliangi metetdaktsü.
Asür L.J.Toshi Sangtam iba lima nungi pilaa aoba osang angashia asür kinüngertem den mangyim jashi lemsatepba osang ka nung, pa asüba ya Eastern Naga purtem asoshi kanga takoksa asütsü ta Nagaland BJP lenir Wb.Hotongse Sangtami metetdaktsü. Pa minister inyakba mapang talisa Eastern Naga purtem alidak NST bus agüja nübortem kanga anisüngzükdaktsüogo ta paisa ashi.