Taoba konang masü saka tarutsü asoshi mera tasen agidi: Tongpang Ozüküm

Mokokchung, Rongchii 27 (TYO): Aortem taoba konang nung dang azüita lidi süra, asenok kodanga tejakleni maotsü, anungji, asen tsüraburtemi otsü tajung yutsübaji wazüka ayutsü tim saka tarutsü putu asoshi bilema mera tasen agia inyaktsüla, ta metetdaktsü. Iba o ya PWD Minister, Wb. Tongpang Ozüküm-i 42 buba Langpangkong Tzükong Mungdang lokti senden sentong ka Mongsenyimti nung alaka jaoker ka ama jembidang ayongzüka ashi.
Paisa ashiba agi, taoba mapang asen tsüraburtemi pei linük asoshi taküm tenlaa aser bendanga agüja inyakba amato, tanü iba senmangji asenok dak nungi samaa aoba angur, anungji, taoba mapang ama tanüa linük meimba nela tanaben shilua arudaktsütsü nüngdaker. “Tangatetba nung marakzüi telungjem nung yimli wazüka ayutsü asoshi inyakdi”, ta paisa shisem.
Yimden (Politics) ajanga dang alima ya melenshir, politics melira alima ya rajang akümtsü aser melitettsü, anungji, politics lu ya meranga ayimtsü asoshi paisa Langpangkong nunger dang inyakdaktsünüba o ka ashi.
Tangba PDA sorkar tasenba ya “temelenshi arudar” ta asüba yimyim nung ajemdaker o masü mapa agi inyaka aotsü meranger, aji saka, temelenshiji minister aser MLA ishikati inyaktsüba mapa masü, anungji, iba nung ya nüburtemi sorkar den amalitepa inyakdaktsünür, ta paisa mepishia ashi.
Mapa meinyakra senji mangutsü aser shirnoki mapa meranga inyaker parnok nem sen peria agütsütsü sorkar telemtetba lir, anungji, ochi shia mapa meranga inyakba den nüburtem atema aruba rongsen timi ketdangsüa amshitsü asoshi paisa tayongzükba ka agütsü.
Taoba mapang district shia nem tenüng kaka agütsüba mapang Mokokchung nema mezüngbo “land of fashion and music” agütsü, aji saka, Ao kini onok nembo ibaji masü saka “mezüngpur” (land of pioneers) agütsütsüla ta nokdakba ama aji oda agütsüogo, ta ashi. Paisa iba dak sendakba nung ashidang, ‘Aortem taoba konang nung dang azüita lidi süra, asenok kodanga tejakleni moutettsü, anungji, asen tsüraburtemi otsü tajung yutsübaji wazüka ayutsü tim saka tarutsü putu asoshi mera tasen agia inyaktsü nüngdaker’.
Sentong nung “Asüng Langpangkong : Meraket yimden aser sobaliba” onük nung ajemdaker Principal Chief Conservator of Forest & HOFF, Wb. I. Panger Jamir (IFS)-i tensa den putepa tagitsü o tajung aika bener arua mungdangsangertem ayongzük. EAC Tamlu Sp. Nükshimatong-i tajungshi o tulu bener arua mungdangertem den lemsatepa liasü.
State sorkari tulurtem nem senpet magütsütsü/mamshitsü asoshi renemba ama, ibaji mapa küma Langpangkong Tzükong Mungdang-ia alaka jaoker aser tulur shinga nema senpet magütsü, saka parnok sentong nung arua adenba tepela temaitsü sayua narojong kaka agütsü, ta osang angazüker.