Taoba Malaysia PM, Najib ochimashiba atema pua lir

Kuala Lumpur, Chiteni 03 (Agencies) : Tanü Sangtennü taoba Malaysia Ato Kilonser, Najib Razak puogo ta osang balala ajanga metetdaktsüogo; küm ter shi tejaklen pai tenzükba state fund nungi sen dollar billion aika komaser samar bushisüngdangba mapang ka nung tang pa apur.
Najib-ji ketdangsertemi ‘remand order’ bener oagi par kidang nungi apu, ta par kinüngertem den tesendaktep tajung alirtem nungi osang jangjaogo.
Osang ka ajanga ashiba agi, asüng Rasemnü okadak Najib anema ken o benoka pa aitsütsü ta bilemdagi.
Ano Malaysia anti-graft agency ajanga ashiba agia Najib pua lir, ta state news agency Bernama ajanga metetdaktsü.
1Malaysia Development Berhad (1MDB) ta ajaba state fund nung paibo kecha aibelena mali, ta Najib-i tekong meranga nokdaker.
Taoksatsüka May ita nung Mahathir Mohamad-i election nung akozüka yokba sülen Najib ya linük toktsür aotsü memelai nokdanga liasü.
Sorkar senotsü ochimashiba maparen nung amshiba atema Malaysia nungeri Najib aitsütsü lenmang balala bushia aruogo aser pa anema ken o benoktsü atema tajemdakdak tajung ka ngutetogo, ta taoba ita nung Reuters osang den shisalemsatepba mapang Mahathir-ia metetdaktsür liasü.
Ochimashiba maparen nung senotsü amshiba atema 2009 küm Najib-i tenzükba 1MDB indang ya bendang linük trok nung densema bushisüngdang südagi.
U.S. Department of Justice ajanga benokba ‘Civil lawsuits’ nunga 1MDB nungi sen US dollar 4.5 billion shi amshi ta aija lir.