Taoba Malives Tatong Tir, Ahmed tepuokdaki yoker

Colombo, June 06 (Agencies): Maldives nung tentetba okadak kati taoba Maldives Tatong Tir, Ahmed Adeeb tepuokdak küm 10 tashi puoka ayutsü obendang agütsüba osang ka tanü, Hombar nü metetdaktsüogo.

Tangar shinga nema shilem magidaktsüi shibanga ayuba takdang telung ka nung ken o angadangba sülen kiralongrabaren ken o nung aija okadaki Ahmed nem tan temerenshiji agütsür lir.

Maldives Tir, Abdulla Yameen’er speedboat rong ka nung atalokba pokshiba lendong den sentakba bushisüngdanga agiba sülen tongpang nung amshitsü prangong injang miim ayuba ken o nung ajemdaker Yameen melenzüker akümtsü ta züngshisang, arishi küm 34 tain Ahmed ya yaküm, 2015 October ita 24 nü apu.

Kasa ken o nung ajemdaker Maldives parliament-ia Ahmed Tatong Tir menden nungi yaküm November ita 5 nü anendaktsü.

Tashiyim agi lenisütsü menden nungi atsüngtokba sülen Maldives toktsür Britain nung jenoka alitsütsü akümsang, Mohamed Nasheed-i Yameen Tir menden nungi atsüngdoktsü nükjidong nung teloktep opposition telok tenteter hopta ka süir külen, okadaki Ahmed yashi, Deobar nü merenshi.

Kiralongraba ken nung ajemdaker Nasheed nema küm 13 tashi tepuokdak puoka ayutsü temerenshi 2015 kümsa agüja liasü.

Ajisüaka, yimtenren tajangzük angutsü nükjidong nung Nasheed-ji merenshitsü ta shia, aikati pa nem agütsüba o bendang anemba osang angazükogo.

Mozü taneptsü agitsü asoshi Britain-i aotsü temelaba Nasheed nem agütsü aser Britain sorkari pa nem refugee ama Britain nung jenoka alitsü temeten taoba May ita agütsü.

Nütsüng yongsük nisung 400,000 shi alidak, Maldives nung sorkar anema nokdakertem kanga sashia merenshiba den külemi, par lanurtemi Islamic State (IS) kiralongrar telok tenüng nung Middle East nung raratsü asoshi apusoba osang bushiteta lir.

Ano külen, tongpang nung amshitsü prangpong 2 tashi miim ayuba kuli kuliser nisung 3 tashi agütsüba ajanga Ahmed-i temerenshi agizüktsüsa jenjang tamajung ajuruba osang ka Ahmed’er okatsür, Mossa Siraj-ia metetdaktsüogo.

“Ahmed den sentakba ken o angadangba sentong ochishia magi. Ahmed-i pa metentsüsa onük kecha mejembidaktsüi pa anema benokba ken o angadanga liasü,” ta pai osang jangjashitsü.

Ajisüaka, Maldives sorkari Ahmed den sentakba ken o angadangba aser pa nem agütsüba o bendang den sentakba osang kecha memetetdaktsüi lir.

“Olulu osangtsüsang dak ajemdaker Ahmed aitsüogo. Pai aibelena aliba kuli kechi monguteti pa tan aitsür lir,” ta tawa tentetba teloktep opposition telok, Maldives United Opposition (MUO) otongdar, Ahmed Mahloof-ia metetdaktsüogo.