Taoba mapang England fast bowler Tyson süogo

Sydney, September 27 (Agencies): Taoba mapang England cricket team nung fast ball aoner aser iba mapang ball tekaratiba aoner rongnung ka ta züngshia alisang, Frank Tyson, arishi küm 85 nung süogo. Pa 1960 küm cricket asaya nungi anisüngzükba sülen Australia nung oa school tesayur, coach, commentator aser kaket zülur ka ama liasü.
Pa nem “Typhoon” ta jalokja liasü aser Tyson-i 1954 nungi 1959 tashi nung England team nungi test match 17 ang asaya, ajisüaka pai iba mapang wicket 17 agia liasü koba ajanga pa average 18.56 aküm. Pai tajungtiba asayatetbaji, tongtipangsa Australia nung 1954-55 kümtem nung Ashes asayaba mapang liasü. Iba asayamung nung pai kangasa junga asayatetba agi England-i 3-1 agi Australia koka liasü. Iba asayamung nung pai wicket ajak agi 28 agia liasü.
Cricket Australia (CA) chief executive officer James Sutherland-i pa nem akhümtsübu agütsüdang, “Frank ‘Typhoon’ Tyson ji England nungi cricket asayar tajungtiba rongnung ka ta teti bilemtettsü,” ta sangdong ka ajanga ashi.
“Pa asaya tashi batsman ajak-i pai aonba ball kanga tsübua liasü. Pa cricket nungi anisüngzükba sülen Australia nung arua ali aser iba mapang pai Victoria aser Queensland nung cricket coach agüja liasü. Australia nung kibong ajaki pa meteta liasü,” ta paisa ashi.
Pa 1930 küm Farmworth, Lancashire nung aso aser Durham University nungi English literature nung graduate asü.
Pai 1952 nungi 1960 tashi nung match 244 asaya aser iba mapang wicket 767 agia liasü. Pai ball kanga kara aonba ajanga temang nung timtem tera adoka arishi küm 30 nung asaya nungi anisüngzük.