Taoba mapang Lok Sabha Speaker Chatterjee süogo

Kolkata (West Bengal), Luroi/August 13, 2018:  Tanü Kolkata nung West Bengal Chief Minister, Mamata Banerjee-i taoba mapang Lok Sabha Speaker asür, Somnath Chatterjee nem akhüm agutsüba noksa nung angur. Pa arishi küm 89 lia tanep Kolkata nung asü.

Kolkata, Luroi/August 13 (Agencies): Tanü linük Tir, Ram Nath Kovind aser Ato kilonser, Narendra Modi na leniba nung linük nüburtemi taoba mapang Lok Sabha Speaker inyaksang, Somnath Chatterjee, nem akhüm agütsüogo.
Pa tanep West Bengal yimtiba, Kolkata yimti nung arishi küm 89 lia asü.
Linük Tiri twitter ajanga, “Pa Parliament nung züngsem teintet ka liasü. Bengal aser India nunger atema takoksa tulu. Ni par kibong aser temeimertem ajak den mangyim lemsateper,” ta lemsatep.
Ato kilonser, Narendra Modi-i, “10 ben tashi MP inyaksang, Chatterjee ya India yimtenren nung teintet lenir ka liasü aser pai Parliamentary democracy takarba kümdaktsü. Chatterjee-i sensakertem aser timtemertem taküm jenjang tajungba kümdaktsütsü atema inyak. Pa asüba ajanga mepelar,” ta ashi.
Congress Party Tir, Rahul Gandhi-i, “Pa ya reju ka mesüka liasü. Parliament züngsem ajaki pa akhümtsübu aser nükshia liasü. Iba ama mangyim mapang nung ni par kibong den jashi lemsateper,” ta ashi.
1984 küm Lok Sabha election nung West Bengal Chief Minister aser Trinamool Congress lenir, Mamata Banerjee-i Jadavpur constituency nungi Chatterjee den toktepa takok angu, aser laia, “Somnath asüba atema jashir. Ni par kibong aser pa meimertem den mangyim lemsateper. Iba ya asenok atema takoksa tulu,” ta ashi.
Iba dak alia Delhi Chief Minister aser Aam Aadmi Party (AAP) tongti lenir, Arvind Kejriwal, Odisha Chief Minister Naveen Patnaik, Telangana Chief Minister K. Chandrasekhar Rao aser Uttar Pradesh Chief Minister Yogi Adityanath nungeria asür nem akhüm agüja mangyim lemsatepogo.
Somnath ya Communist Party of India (Marxist) nungi liasü aser 2004 nungi 2009 küm tashi LS Speaker inyaka liasü.