Taoba mapang Union Minister Fernandes alima nungi pilaogo

New Delhi, January 29, 2019: Tanü New Delhi nung linük tatong Tir, M Venkaiah Naidu aser  Loktantrik Janata Dal (LJD) lenir, Sharad Yadav nati taoba mapang Union Defence Minister, asür George Fernandes nem akhüm agutsüba noksa nung angur. Kasa noksa nung Fernandes kinüngtsü, Leila Kabir-a angur. Fernandes arishi küm 88 lia tanep asü.

New Delhi, January 29 (Agencies): Taoba mapang Union Defence Minister aser socialist lenir, George Fernandes Mongolbarnü arishi küm 88 lia alima nungi pilaogo.
Fernandes ya Alzheimer’s tashidak agi shiranga liasü, aser ibaji ajanga tesüiba küm aika pai lokti nung maden; tawa pa swine flu wara agi kongshi, ta pa den mapang talangka nungi inyaksema arur, Jaya Jaitly-i metetdaktsü.
Fernandes ya Karnataka state kübok Mangalore nung Khristan kibong ka nung aso, aser Mumbai nung brand trade union nung alidang 1974 küm pa leniba nung Railways strike ka ayongzük, koba ajanga linük tesem ajak kongshi; iba mapang nungji pa nüngtugu akum.
Iba sülen V.P. Singh-i aniba National Front teloktep sorkar mapang nung pa Railway Minister shim.
RSS anemer ka süaka Fernandes-i 1998 aser 1999 küm Ato kilonser, Atal Bihari Vajpayee mapang BJP-i aniba NDA sorkar nung aden; iba mapang nungji pa Defense Minister shim. Pa defense minister inyakba mapang nung 1999 küm India-i Pakistan den Kargil rara. Ano pa mapang nungsa 1998 küm India-i Pokhran nung nuclear tendanga liasü.
1977 küm Ato kilonser Indira Gandhi tamakok ngudaktsüba Janata Party sorkar nunga pa Industry Minister liasü. Iba sülen pai industrialists den anemtepa Coca-Cola aser IBM dang foreign exchange violation charges meshi, koba ajanga parnoki iba maparen anener India toktsür aotsüsa akum. Iba sülen Coca-Cola melena linük nung 77 tajemtsü yanglu.
2009 küm Parliamentary elections nung pai tamakok anguba sülen pai yimtenren nung joko shilem magi. 1967 küm Lok Sabha Elections nung pai mezüng shilem agia Bombay South nungi pai Congress MP, SK Patil madak takok ngua liasü.
Fernandes’er jabaso US nungi aruba sülen Bodhbarnü asüpila sentong agitsü.