Taoba Meghalaya anema bushisüngdangtsü kanga kerar: Rijiju

Shillong, January 29 (Agencies): Tetsür dak tim mesüi benshiba nung ajemdaker Meghalaya Angh, V Shanmuganathan menden nungi anenba dak sentakba nung Union Minister of State for Home Affairs, Kiren Rijiju-i, ‘documentary kuli’ mali, anungji iba ken o bushisüngdangtsüji kanga karara, ta ashi.
Shillong nung North East Investment Summit alidang Rijiju-i osangbenertem dang, “Tang tashi nungbo taoba Angh anema bushisüngdangtsü asoshi documentary kuli mali. Onok ket nung kecha mali,” ta ashi.
“Tai tonglokja aliba bushisüngdangtsü atema sorkari inyaktsü asü meinyaktsü’ar ni kecha ashitsü makok. Ibaji inyaktsü kanga karar,” ta Union minister-i ashi.
Paisa, Shanmuganathan-i “moral grounds” nung anen, ta ashi.
Tetsür kati, la interview ka agütsütsü atema Raj Bhavan-i aodang Shanmuganathan-i la dak tim mesüi kongshi, ta tai tongloktsü.
Lai teka agi züluba shidi nungji lai, “Ni iba jagi orr, pai kü dang kü nija osangtem asüngdang, aser tashiyim amshia kü dak tebang mesep,” ta zülua lir.
Tetsürla jagi Angh anema ken o agütsüba nung ajemdaker Raj Bhavan nung inyaker staff zügsem 100-i shidi ajanga Ato kilonser, Narendra Modi dang, “Shanmuganathan-i Raj Bhavan akhümket menden dak mapet inyak, aser Angh Ki ji tetsürtem club ka kümdaktsü,” ta aitsü.
“Pai Angh menden agizükba mapang nungi staff tem kanga mezüngmeshir, shisa belemdaktsür aser kangshidaktsür,” ta parnokisa shidi nungji shia lir.
Item tai tongloktsüba sülen Arunachal Angh mapa repsema abensang Shanmuganathan-i pasasa pa menden nungi anen.