Taoba Minister Nokzenketba alima nungi pilaogo

Dimapur, January 5 (TYO) : Mongulbar anepdang Nagaland nung taoba Minister Nokzenketba iba lima toktsür ogo. Pa arishi küm 67 nung tanep Jorhat (Assam) nung asü.
Kinüngertemi ashiba agi, asür Nokzenketba temulungjang nung timtem kar atema NEIGRIHMS, Shillong nung anepalu aser tanep pa kinungtsüi den tangar kar den check up atema Mokokchung nungi apuso.
Ajisüaka, len tom nung pa temang mejungi akümba agi pa Jorhat nung private clinic ka nung anepalutsü aniok aser idakji ICU nung anepdang tanep 9:00 ako meta pa tango sadem. Pai pa kinungtsü den jala asem toktsür alima nungi pilaogo.
Asür Wb. Nokzenketba ya September 19, 1948 nü Chungtia yimti nung aso aser 1982 küm pa mezüng 28 Koridang Assembly constituency nungi Independent candidate ka ama Nagaland Legislative Assembly nung züngsem aküm. Iba sülen pa Congress nung aden aser Congress sorkar kümteta pa Minister inyak.
1987 küm pa kasa constituency nungi Congress party ticket amer takok angu aser Deputy Chairman, State Planning Board inyak.
1989 nunga pa kasa constituency nungi takok angu aser asür Vamuzo chief minister-i aniba sorkar nung Agriculture Minister inyak.
Pa den asüpila sentong asüng New market nung par kidang agitsü.
Nagaland chief minister TR Zeliang-i sangdong ka nung Wb. Nokzenketba asüba osang angashia aoksar ta metetdaktsü.
Asür Nokzenketba ji tasü tait, ochishir aser nübortem atema bendanga agüja inyakba lennir ka liasü aser pai iba lima toktsür aoba ajanga Naga nunger takotet lennir ka samaogo, ta TR Zeliang-i sangdong nung shia lir.
“Iba mangyimba mapang ni aser kinungtsü den ozü tanur ajaki nür kibong den asüku lemsateper. Tsüngremi nür kibong nem anisüngzük aser tejashi koktettsü atema tashi agüjang ta sarasademtsür” ta chief minister-isa sangdong nung asür Wb. Nokzenketba kinungtsü den lemsatep.
Nagaland nungi Lok Sabha MP Neiphiu Rio-ia sangdong ka nung asür Wb. Nokzenketba asüba atema mangyimba metetdaktsü.
Asür Wb. Nokzenketba-i nübortemi asoshi bendanga agüja inyak aser pai teti tangar memenepertem aser meshimejungertem yari. Pa asüba ajanga asen lokti nungi takotet lennir ka samaogo, ta Rio-i sangdong nung shia lir.