Taoba MP Chief Minister Babulal süogo

New Delhi, August 21 (Agencies): Taoba mapang Madhya Pradesh Chief Minister aser BJP lenir, Babulal Gaur mapang talangka shiranga aruba sülen tanep New Delhi nung aliba hospital ka nung süogo; pa arishi küm 89 liasü.
Pa blood pressure temajungba küma tawa hospital-i anir oa liasü.
Iba osang angashia Ato kilonser, Narendra Modi-i, “Babulal Gaur-i küm aika nüburtem tenzüka aruogo. Jana Sangh nung adenba mapang nungi pai party tashi itshitsü atema inyaka aru. Madhya Pradesh nung Minister aser Chief Minister ama state nung temelenshi atema pai mapa aika inyakogo,” ta metetdaktsü.
Paisa, “Pa asüba ajanga jashir. Par kibong züngsemtem aser pa pusemertem den mangyim jashi lemsateper,” ta lemsatep.
Iba dak alia Union Home Minister Amit Shah, Defence Minister, Rajnath Singh, Railway Minister, Piyush Goyal, Uttar Pradesh Chief Minister, Yogi Adityanath aser deputy CM, Keshav Prasad Maurya nungeria mangyim lemsatepogo.
Amit Shah-i, “Gaur-i Emergency anema sashia nokdak, ibayongji pa ita 19 tepoukdak ayu, ta ashi.
Rajnath Singh-i, Gaur-i sorkar aser BJP nung menden balala nung tenzüka aruogo; pa ya sentong ayongzüker aser yimsüsür tajung ka liasü, ta ashi.
Madhya Pradesh Congress aser party lenir, Jyotiraditya Scindia-ia mangyim jashi lemsatep.
Congress otongdar, Shobha Oza-i, “Gaur asüba ya state nung yimtenren mapang ka süiba lir. Pa dak sasapela liasü aser ochishir lenir ka liasü,” ta ashi.